Ազատամարտիկ Աշոտ Իսախանյանը, ով գտնվում է «Հրազդան» ՔԿՀ-ում, նամակ է հասցեագրել ԳԱԼԱ—ի էլեկտրոնային հասցեին: Նա ուղերձով դիմում է Սերժ Սարգսյանին, ԼՂՀ նախագահ Բակո Սահակյանին, ինչպես նաև Հայաստանիև Արցախի պաշտպանության նախարարներին:

Ազատամարտիկը հորդորում է բացել աչքերը, սթափ նայել իրավիճակին և գնահատել իրավիճակը որպես պատերազմական, ինչպես նաև ձեռնարկել անհրաժեշտ գործողություններ:

«Մեծարգո պարոնայք, դուք պատերազմ տեսած մարտական փորձառու գործիչներ եք և պիտի հասկանաք, որ արդեն իսկ 100 տոկոս պատերազմ է սկսվել: Չե՞ք տեսնում, որ գնդակոծվում են մեր գյուղերը, որի արդյունքում խաղաղ բնակիչներ են անգամ զոհվում:

Պարոնայք նախագահներ և նախարարներ, ի՞նչ եք մտածում:

Աթոռի կռիվ անելու փոխարեն բանակն ուժեղացնել է պետք: Մի՞թե հույսներդ դրել եք անփորձ 18-20 տարեկան երեխաների վրա: Ե՞րբ պիտի հասկանաք, որ բանակի կողքին պետք է փորձառու, պատերազմ տեսած ազատամարտիկներ, այսինքն՝ մենք»:

Ուստի և կալանավորված ազատամարտիկն առաջարկում է կալանավայրերում ազատազրկված բոլոր ազատամարտիկներին ազատ արձակել, զինել և ուղարկել սահման:

«Պարոն Սերժ Սարգսյան, պահանջում եմ թույլ տալ ինձ կանգնելու մեր բանակի կողքին, մեր զինվորի կողքին՝ պաշտպանելու մեր ազգին, մեր ժողովրդին: Պարոնայք, բավարար է, դադարեցրեք հետապնդումը և ազատեք Հայաստանիև Արցախի կալանավայրերում գտնվող բոլոր ազատամարտիկներին, զինեք մեզ և հրաման տվեք պաշտպանել մեր հայրենիքը: Դուք պարզապես պարտավոր եք այս պահանջը կատարել:

Էլ ո՞ւր է մնում ձեր նամուսը, թասիբն ու անցած մարտական ուղին:

Իմ տեղը սահմանն է, խրամատն է, հայ զինվորի կողքին, և պարտավոր եմ ներկա իրավիճակում լինել խրամատում: Ինձ համար հայրենիքն սկսվում է խրամատից»:

Ազատամարտիկը վստահ է նաև, որ արդեն իսկ պատերազմը սկսվել է, և պետք չէ հապաղել, պետք է հարյուր տոկոսով մարտական պատրաստվածության բերել Զինված ուժերը և նախահարձակ լինել.

«Կրկնում եմ՝ պետք է ամրապնդել սահմանները փորձված ազատամարտիկներով: Եթե գոնե ի վիճակի չեք անելու, ուրեմն այլ ելք չկա, քան պահանջել ձեր բոլորի հրաժարականները»,- նամակն այսպես է եզրափակում ազատամարտիկ Ա. Իսախանյանը:

http://galatv.am/