Ցնցող հանցագործությունը ալեկոծել է Նովոսիբիրսկը, ապա նաև՝ Ինտերնետի ողջ ռուսալեզու սեգմենտը. դատարանը հրաժարվել է կալանավորել տեղական օլիգարխի 16-ամյա որդուն, ով մեղադրվում է իր նախկին ընկերուհու սպանության մեջ: Ինչպես պարզել են ինտերնետ-օգտատերերը, բացի հարուստ հայրիկից՝ օլիգարխի որդին ունի նաև Մոսկվայում կապեր ունեցող մերձավոր ազգական:

Սարսափելի սպանությունը տեղի է ունեցել այս տարվա օգոստոսի 28-ին.  16-ամյա աղջիկը գնացել է համադասարանցու՝  նովոսիբիրսկցի խոշոր գործարար Իգոր Կոնկովի որդու ծննդյան օրվա հանդիսությանը: Երեկույթն անց էր կացվում Կոնկովների տանը, այնտեղ էլ քննիչները գտել են աղջկան՝  դանակահարված: Աղջկան դանակի չորս  հարված են հասցրել պարանոցին և մի քանիսը՝  ձեռքերին, ակնհայտ է, որ զոհը ամբողջ ուժով  պաշտպանվել է:

Հանցագործությունը կատարելու կասկածանքով ձերբակալվել էր տուժողի հասակակից տղան,  «Газете.Ru»-ին հայտնել են  ՌԴ քննչական կոմիտեի Նովոսիբիրսկի շրջանի կառույցում:

Սպանվածի հարազատները գտնում են, որ սպանությունը ծրագրված էր՝ աղջիկը հանդիպում էր օլիգարխի որդու հետ, բաժանվելուց հետո գործարարի որդին սկսել է սպառնալ՝  կարճ հաղորդագրություններ ուղարկելով, որ կմորթի: Աղջկա հայրը մտավախություն ունի, որ հարուստ հարազատները դստերը սպանողին բանտից կպրծացնեն՝ չէ՞ որ դատարանը հրաժարվել էր կալանավորել օլիգարխի որդուն՝ նրա նկատմամբ ընտրվել է խափանման միջոց՝ տնային կալանք: Այդ կապակցությամբ աղջկա հայրը օգնություն է խնդրել ինտերնետ-համայնքից՝  իր կոչը հրապարակելով ցանցում:

Ինտերնետ համայնքն էլ վայրկենաբար արձագանքել է  հոր օգնության կանչին՝  Контакт-ում ստեղծելով «Փողն ու կապերը չեն որոշում: Ճշմարտությանը կհասնենք» խումբը, որի միջոցով օգտատերերը փորձում են օգնել սպանված աղջկա հարազատներին:

«Ժողովուրդ, պետք է գործել: Ծնողներին կարող են և վախեցնել (նրանք գտնվում են շոկային վիճակում), բայց մեր բերանները ոչ ոք իրավունք չունի փակել: Որքան շատ մարդ, այնքան լավ: Պետք է գրել բոլոր ծրագրերին, թող ամբողջ երկիրն իմանա»,- գրում է այդ սոցցանցի օգտատիրուհիներից  մեկը:

Սոցցանցում օգտատերերը պահանջել էին կալանքի տակ վերցնել ենթադրյալ մարդասպանին՝  հանրագիրն  երկու ժամվա ընթացքում ստորագրել էր հազարից ավելի մարդ:

Ստորագրահավաքի  սկսվելուց հետո սպանված աղջկա հորից ու նրա փաստաբանից ստորագարություն էին վերցրել գործի նյութերը չհրապարակելու մասին: Քննչական կոմիտեի տեղական կառույցը մամլո հաղորդագրություն էր տարածել, որ այնուամենայնիվ սպանության մեջ կասկածվողը չի գտնվելու տանը:

Քննչական կոմիտեի տեղական կառույցը տեղեկացրել էր, որ դատարանը բավարարել է  քննիչի միջնորդությունը մեղադրյալին բուժհաստատությունում տեղավորելու մասին՝ ստացիոնար դատահոգեբանական-դատահոգեբուժական համալիր  փորձաքննություն անցկացնելու համար: Ներկա դրությամբ մեղադրյալը գտնվում է այնտեղ: Քրեական գործի նախաքննությունը շարունակվում է, ասվում է ՔԿ Նովոսիբիրսկի շրջանի կառույցի կայքէջում:

«Փաստինֆո»