ՀՀ գյուղատնտեսության նախարար Սերգո Կարապետյանը և Երևանի քաղաքապետի տեղակալ Դավիթ Օհանյանը ծանոթացել են մայրաքաղաքի Կասյան փողոցին հարակից հատվածում վերաբացված գյուղատնտեսական մթերքների տոնավաճառի պայմաններին:

Տոնավաճառի 100 տաղավարներում սեփական արտադրանքը վաճառելու հնարավորություն են ստացել  ՀՀ  6 մարզերից ժամանած գյուղացիներ: ՀՀ գյուղատնտեսության նախարարության և Երևանի քաղաքապետարանի նախաձեռնությամբ շաբաթվա հանգստյան օրերին նման շուկաներ բացվում են արդեն 5-րդ տարին անընդմեջ: ՀՀ գյուղատնտեսության նախարար ՍերգոԿարապետյանն ու Երևանի քաղաքապետի տեղակալ Դավիթ Օհանյանը շրջել են շուկայի տարածքում, զրուցել գյուղմթերք վաճառող գյուղացիների և գնորդների հետ, նաև գնումներ կատարել:

ՀՀ գյուղատնտեսության նախարար Սերգո Կարապետյանը, պատասխանելով լրագրողների հարցերին, նշել է, որ, առատ բերքով պայմանավորված, այս տարի սովորականից քիչ ավելի շուտ են բացվում գյուղմթերքների տոնավաճառները: Նախարարը կարևորել է այն փաստը, որ գյուղատնտեսական բարենպաստ տարվա շնորհիվ նաև զգալիորեն ցածր կլինի պտուղ-բանջարեղենի առանձին տեսակների արժեքը: Երևանի քաղաքապետի տեղակալ Դավիթ Օհանյանն էլ  վստահեցրել է , որ ՀՀ գյուղատնտեսության նախարարության հետ համագործակցությունը կշարունակվի և, անհրաժեշտության դեպքում, Երևանի քաղաքապետ Տարոն Մարգարյանի հանձնարարությամբ մայրաքաղաքում գյուղմթերքի տոնավաճառների համար կտրամադրվեն նոր տարածքներ:

Դավիթ Օհանյանը նաև հիշեցրել է, որ, բացօթյա անօրինական առևտրի արգելքով պայմանավորված, դեռևս տարիներ առաջ գյուղատնտեսական փոքր շուկաներ են բացվել նաև մայրաքաղաքի վարչական շրջաններում: Այսօր դրանց թիվը 34-ն է: Մայրաքաղաքի տարբեր հատվածներում գործում են նաև պտուղ-բանջարեղենի վաճառքի կրպակներ: Երևանի քաղաքապետի տեղակալ Դավիթ Օհանյանը նշել է, որ նմանատիպ տոնավաճառների հիմնական առավելությունը  գյուղացուն իր արտադրած թարմ գյուղմթերքն  անմիջապես՝ առանց միջնորդի սպառողին վաճառելն է, ինչը կանխում է ապրանքի գնի արհեստական բարձրացումը:

Երևանի քաղաքապետարանի տեղեկատվության
և հասարակայնության հետ կապերի վարչություն