«Եզո» անվանելու համար հարևանին դանակահարելուց հետո ամբաստանյալ 26-ամյա Արթուրը և նրա քեռին՝ վկա Սարո Հարությունյանը հարևանին և շտապօգնության բժշկին ասել են, որ մահացած՝ 41-ամյա Անդրանիկը բակում ընկել է երկաթի վրա: Այդ մասին այսօրվա նիստում հայտարարեց վկա Սարո Հարությունյանը:

Երևանի Շենգավիթ վարչական շրջանի ընդհանուր իրավասության դատարանում վկան պատմեց, որ գրեթե յուրաքանչյուր օր այցելել է քրոջ որդուն, վերջինս տանը վերանորոգման աշխատանքներ է կատարել, ինքն էլ օգնել է:

Վկան ճանաչում էր  նաև տուժողին, նրա հետ ևս մտերմություն են արել:

Դատարանում վկան հայտնեց, որ դեպքի օրը գնացել է ամբաստանյալի տուն, այնտեղ եղել են 3-ով՝ վկան, ամբաստանյալը և տուժողը: Քանի որ նախորդ օրը վկայի ծննդյան օրն է եղել միասին սեղան են նստել ու նշել, երկար ժամանակ են միասին անցկացրել, խմել են 3 շիշ օղի, իսկ ավելի ուշ կերուխումը վերածվել է քաշքշուկի:

Տուժողն ու Արթուրը միմյանց քաշքշել են, վկան ատարվածը որպես կատակ է ընդունել և չի միջամտել, իսկ երբ որոշել է միջամտել Արթուրն ասել է. «քեռ Անդոյին դանակով ծակեցի»:

Ըստ վկայի՝ դանակահարված տուժողը ձայն չի հանել, սակայն շնչել է, վրան էլ արյան հետքեր չեն եղել, մեջքի վրա պառկած է եղել:

Զանգահարել են հարևան Արմենին, ապա 15-20 րոպե անց էլ՝ որոշել շտապօգնություն կանչել ու նրանց ասել, թե իբր Անդրանիկը բակում ընկել է երկաթի վրա, սակայն դեպքի վայր հասած շտապօգնությունն արձանագրել է, որ տուժողի մոտ գրանցվել է կենսաբանական մահ:

Նիստը նախագահող դատավոր Ալեքսանդր Ազարյանը նկատեց, որ վկայի ցուցմունքներում էական հակասություններ կան: Մասնավորապես՝ վկան սկզբում չհայտնեց, որ վիճաբանությունը ծագել է «եզո» բառից, իսկ նախաքննական մարմնին 3 անգամ ցուցմունք է տվել, որտեղ հայտնել է այդ մասին:

Դատարանի հարցադրմանն ի պատասխան՝ վկան ասաց, որ տուժողը մի քանի անգամ իր քրոջ որդուն ասել է «եզո վեր կաց տանդ գործն արա», բայց և ավելացրեց, որ այդ բառը հաճախակի են նրանք ընկերաբար միմյանց ասել:

Մյուս հակասությունն էլ վերաբերում էր նրան, որ վկան նախաքննական մարմին չի հայտնել այն մասին, թե տուժողն իբրև փորձել է խեղդել իր քրոջ որդուն, սակայն դատարանում ասաց, որ չնայած չի տեսել, քանի որ տեսողությունը վատ է, բայց լսել է, որ քրոջ որդին իբրև իրեն խեղդելու պահին ասել է «վախ թող» արտահայտությունը:

Դատարանի հարցին, թե ինչու՞ այս մասին վկան նախաքննական մարմնին չի հայտնել, վերջինս անտրամաբանական պատասխան տվեց՝ «չեն հարցրել, չեմ ասել», միևնույն ժամանակ, առանց հարցնելու՝ նախաքննական մարմին վիճաբանության պատճառի մասին հայտնել էր:

Հանցագործության գործիք խոհանոցային դանակի մասին էլ ասաց, որ դանակը չի տեսել, Արթուրն իրեն ցույց չի տվել:

Վկայի ցուցմունքները իրարամերժ էին. նկարագրելով քաշքշուկից հետո տուժողի դիրքը՝ ասաց, որ նա մեջքի վրա պառկած էր, ապա նախագահողի հարցին թե, Անդրանիկը վեճից հետո վերջին պահին ի՞նչ դիրքով է եղել, ասաց՝ Արթուրը պառկած էր, տուժող Անդրանիկը՝ վրան:

Տուժողի իրավահաջորդը, ով մահացածի մոր կողմից հարազատ քույրն է, հայտարարությամբ հանդես եկավ՝ նշելով, որ մայրը մինչ այսօր որդու մահվան իրական պատճառը չգիտի և որ ինքը թաքցնում է մորից:

Ըստ տուժողի իրավահաջորդի հայտարարության՝ ամբաստանյալը դանակը պահել է տանիքում և միայն դեպքի հաջորդ օրն է իրավապահներին հայտնել այդ մասին:

Հուզված կինը նշեց նաև, որ եթե շտապօգնություն շուտ կանչեին, եղբայրը հաստատ ողջ կմնար: «Հասկանալի է՝ վախեցել եք, բայց կարելի էր զանգել, ցավակցել կամ ներողություն խնդրել մարդկայնորեն, ես ոչինչ չէի ուզում»,- ասաց տուժողի իրավահջորդը:

Հաջորդ՝ հունիսի 15-ին կայանալիք նիստին կհարցաքննվի հարևան վկա Արմենը, ով այսօրվա դատական նիստին չէր ներկայացել, սակայն դատարանին հայտնել էր, որ գտնվում է Գորիսում և չի կարող ներկայանալ նիստին:

Ըստ մեղադրանքի՝ Արթուրը 2014թ. նոյեմբերի 6-ին՝ ժամը 21:00-ի սահմաններում, իր տանը, գտնվելով ալկոհոլային հարբածության վիճակում, իրեն «եզո» անվանելու հարցի շուրջ վիճաբանել է իր հարևան Անդրանիկի հետ և խոհանոցային դանակով 1 անգամ հարվածել նրա որովայնի ձախ շրջանին:

Անդրանիկին պատճառվել են ձախից որովայնի կողմնային պատի ծակած-կտրած, որովայնի խոռոչ թափանցող վերքով, որովայնամզի, հետորովայնամզային տարածության, որովայնային աորտայի վնասման ձևով կյանքի հետ անհամատեղելի վնասվածքներ, ինչի հետևանքով նա մահացել է:

Արթուրին մեղադրանք է առաջադրվել ՀՀ քրեական օրենսգրքի 104-րդ հոդվածի 1-ին մասով: Նրա նկատմամբ որպես խափանման միջոց է ընտրել կալանավորումը: