Այս կիրակի՝  մայիսի 31-ին Սևանում օծվելու է սրբ. Ավետում եկեղեցին:

Այս եկեղեցին հիմնադրման օրվանից հայտնվել է տհաճ իրավիճակների կիզակետում: Նախ՝ կառուցվում է 2006-ից ու երբ 10 տարի անց մի կերպ ավարտին է հասել և թվում է, թե՝ դժվարն արդեն անցյալում է, էլի խնդիրներ կան:

Եկեղեցին կառուցվում է բարերար` փարիզաբնակ Ս. Պետոյանի միջոցներով, շինությանը հովանավորում էր նաև ամերիկաբնակ հայտնի բարերար Ալեք Մանուկյանի թոռը` Արեն Մանուկյանը:

Ժամանակին նշվում էր, որ  կառույցի (պատվիրատուն Մայր Աթոռն էր) ավարտին չհասցնելու պատճառներից մեկը բարերարների կողմից փոխանցված գումարը նպատակին չծառայեցնելն էր։ Նաև ասում էին, որ որոշ թերությունների համար շինությունը չի ընդունվել Գարեգին Բ- ի կողմից: Կառուցապատողն էլ այլ բան էր ասում. Ասում են նաև թե եկեղեցու վրա նավս կա, սևանում տերուտիրական բողոքականների աչքն է: Ինչևէ… սևանցիները հասցրեցին 10 տարվա մեջ մի քանի անգամ հիասթափվել՝ այդ ընթացքում էլ եկեղեցու վրա աշխատող երկու մարդ մահացան:

Այնուամենայնիվ սևանցիները հուսով են, որ այդ ամենը հետևում է և վերջապես եկեղեցին կբացի իր դռները, սակայն,այստեղ դարձյալ ամեն բան հարթ չէ, այժմ  սևանցիները նոր թեմա ունեն խոսելու.

Խոսակցություններ են շրջում, թե՝ բավարար չեն եղել բարերաների ներդարած գումարները և Սևանի քաղաքապետ Ռուդիկ Ղուկասյանը ռուսաստանաբնակ սևանցիներից օգնություն է խնդրել, իբրև եկեղեցու խաչերն ու զանգը ապահովելու համար: Ըստ մեր տեղեկության, նրանցից մեկը 5 հազար դոլար է ուղարկել, բացի այդ գումար է հավաքվում նաև տեղի ունևոր բնակիչներից:

«Հայկական Վարկածը» փորձեց հարցի պարզաբանումը ստանալ Գեղարքունիքի թեմից . ինչն է պատճառը, որ եկեղեցու խաչն ու զանգերը գնելու գումար բարերարը չի հատկացրել. Տեր Ստեփանոս քահանան պնդեց հակառակը՝ բարերարը հոգացել է եկեղեցու բոլոր ծախսերը՝ թե, խաչերի, թե՝ զանգերի, թե՝ շրջակայքի բարեկարգման և թե կահավորման ծախսերը և ինքն էլ մասնակցելու է օծմանը: Մեր դիտարկմանը, որ լավ կլիներ եկեղեցու դիմացի փողոցի քանի մետր ասֆալտն էլ արվեր, թե չէ խայտառակ վիճակ է ,տեր հայրն՝ ասաց .«Կներեք, բայց դա եկեղեցու հետ ինչ կապ ունի» :

Իրոք մինչև շաբաթվա վերջ մնացել են հաշված օրեր. Բայց եկեղեցու հարակից տարածքի փողոցները  խայտառակ վիճակում են: Ու քանի որ Սևանի քաղաքապետը և Գեղարքունիքի մարզպետը չեն շփվում միմյանց հետ, ավագանու անադամներն էին գնացել Գավառ, մարզպետին խնդրելու, որ գոնե մինչև բացումը եկեղեցու հարակից հատվածը ասֆալտապատի, սակայն մերժում են ստացել:

Ուրեմն ինչո՞ւ է գումար հավաքում Սևանի քաղաքապետը, եթե բոլոր ծախսերը հոգացել է բարերարը և չի ասֆալտապատվում եկեղեցու շրջակա տարածքը:

Իբր այս ամենը քիչ էր, դեռ սրբ. Ավետում եկեղեցու օծման օրն էլ Արտաշատում բացվում է մեկ այլ՝ Վարչապետի կառուցած եկեղեցին, որի բացմանը Հովիկ Աբրահամյանը հրավերք է կատարել: Սևանցիները մտահոգ են, որ բնականաբար այնտեղ կշտապեն բոլոր պաշտոնյաները, այդ թվում  և Վեհափառը,  ում սևանցիները ակնկալում էին գոնե այդ օրը Սևանում տեսնել: