Իսպանական «Կորսան Կորվիամ Կոնստրուկսյոն Էս Էյ»-ը որոշել է հեռանալ Հայաստանից և մրցույթ է հայտարարել իր թանկարժեք ու ծանր տեխնիկան Հայաստանից դուրս բերելու համար: Մրցույթը շահել է թուրքական բեռնափոխադրողը, որն արդեն լծվել է այս գործին: Ինչո՞ւ է որոշել իսպանական ընկերությունը հեռանալ Հայաստանից, այն դեպքում, երբ ծրագիրը դեռ չի ավարտվել, և առջևում դեռ շատ աշխատանքներ կան: «Կորսան Կորվիամ Կոնստրուկսյոն Էս Էյ» ընկերությունից պարզաբանեցին, որ իրենց պատկանող բետոն փռող երկու մեքենաներից մեկն Աշտարակում էր, մյուսը՝ Արարատում: «Արարատի հատվածում մեքենան ունեցել է 15 մետր լայնություն, իսկ Աշտարակում՝ 12 մետր: Արարատինն այլևս չենք պատրաստվում օգտագործել հաջորդ տրանշների համար, քանի որ դա մի քիչ ավելի լայն է: Այս մեկը գնալու է և ներկայում գտնվում է մաքսային պահեստում: Իսկ մյուս մեքենան մեզ մոտ է: Բացի սրանից, նախատեսվում է բերել ևս մեկը, որն ավելի լայն կլինի: Այդ նոր մեքենան Հայաստանում կլինի սեպտեմբերին»: Ըստ ընկերության տնօրենի օգնականի, բետոնի աշխատանքները հիմա վերջացել են երկու հատվածներում էլ, իսկ Թալինում դեռևս հողային աշխատանքներ են, և բետոնի աշխատանքների համար եղանակային անհրաժեշտ պայմաններ չկան,- ասաց օգնականը:

 — Ձեր մեքենաները գնում են Հայաստանից: Դուք դադարեցրե՞լ եք աշխատանքները:

— Աշխատանքները դադարեցված են, բայց ակնկալիքով, որ կկարգավորվի ամեն ինչ, և դրանք կվերսկսվեն: Մեր կողմից չկա այնպիսի բան, որ մենք հրաժարվում ենք աշխատանքից: Հուսով ենք, որ կկարգավորվի ամեն ինչ:

— Ի՞նչ նկատի ունեք, երբ ասում եք՝ «կկարգավորվի ամեն ինչ»:

— Ես այս հարցին իրավասու չեմ պատասխանել:  Տնօրենի օգնականը չասաց, թե ինչ դժգոհություններ ունեն իսպանացիները և ինչու են դադարեցրել աշխատանքները, սակայն նրա պատասխանն ակնհայտորեն հակասում է ՀՀ տրանսպորտի և կապի նախարար Բեգլարյանի հայտարարություններին, ով մարտի 25-ին ԱԺ-ում հարցուպատասխանի ժամանակ, պատասխանելով հարցին, թե ինչու են «Հյուսիս-հարավի» ժամկետներն անընդհատ ձգձգվում, ասաց, որ ծրագրի շրջանակներում շինարարական աշխատանքները շարունակվում են, և անհանգստանալու խնդիր չկա: «Մենք այսօր աշխատանքների վերջը տեսնում ենք,-ասաց նա,- դժվարություններ կան՝ կապված հողօտարման հետ, 17 գործ ունենք դատարանում, բայց նախապատրաստական աշխատանքներն ընթացքի մեջ են»: «Հասկանում եմ ձեր անհանգստության պատճառը, թե երբ ենք կարողանալու հյուսիսը հարավին կապելու խնդիրը լուծել»,-ասաց նա: Երեկ հեռախոսով խոսեցինք նաև նախարարի հետ: Նա շատ զարմացավ, երբ լսեց, որ իսպանական ընկերության մեքենաները մաքսայինում են: «Սուտ տեղեկություն է, որ «Կորսանը» գնում է,- ասաց նախարարը,- մեքենաներից մեկը լավ չի աշխատում, և դա հանում են»: Ի դեպ, մենք տեղեկացանք, որ մեքենան գնալու է Հունաստան՝ ճանապարհների կառուցման համար, իսկ փչացած մեքենան հաստատ այլ երկիր չէին տանի:

— Իրենք, այնուամենայնիվ, ինչ—ինչ պատճառով դադարեցրել են աշխատանքները:

— Ազգային ժողովում էլ եմ հայտարարել, ասել, որ մինչև գիշերը և ցերեկը պլյուս 8 աստիճան չլինի, չեն կարող աշխատանքներն սկսել: Հիմա սպասվում է, որ ապրիլի 4-ին մենք այդ եղանակը կունենանք և աշխատանքները կսկսենք:

— Ոչ մի այլ խնդիր «Կորսան» իսպանական կազմակերպության հետ չկա՞:

— Ոչ մի խնդիր չկա: Այդ կարգի ապատեղեկատվություն տարածողները երևի իրենք են ուզում, որ խնդիրներ լինեն:

ՀԳ. Փաստ է, որ «Հյուսիս-հարավ» ծրագիրը բազում խութերով է ընթանում, և դա չի թաքցնում անգամ կառուցապատող ընկերությունը: Ու թեև իսպանացիները զուսպ են և չեն ուզում ՀՀ իշխանությունների և մասնավորապես տրանսպորտի նախարարության հետ հարաբերությունները փչացնել, բայց կուլիսներում խոսակցություններ են շրջանառվում, որ իսպանական ընկերությունը սարսափած է հայկական ատկատների չափերից, փնթի, անկազմակերպ աշխատանքից, ժամկետները խախտելու և բազմամիլիոն տուգանքներ վճարելու պատրաստակամությունից:

Սյուզան Սիմոնյան