ՀՔԾ նախկին պետ Անդրանիկ Միրզոյանի անունը վերջին ամիսներին շրջանառվում է ԱԱԾ-ի կողմից քննվող քրեական գործերում: Մի գործի մասին գերգաղտնի այս գերատեսչությունը բարեհաճեց հանրությանը տեղեկացնել շուրջ մեկ տարվա քննությունից հետո: Տարածված հաղորդագրությունը «կոդավորված» լեզվով է գրված, այնպես, որ ոչ ոք չհասկանա, որ սա հենց Միրզոյան Անդրանիկի անվան հետ կապվող գործն է: Հաղորդագրության մեջ ասվում է, որ կաշառք ստանալու կասկածանքով ձերբակալվել է նախկինում ՀՀ պետեկամուտների կոմիտեի օպերհետախուզության վարչության 6-րդ բաժնի պետ, Արմավիրի հարկային տեսչության պետ Արամ Հովսեփյանը: «Պարզվել է, որ Արամ Հովսեփյանը 2007 թվականի նոյեմբեր ամսին գործարար Ռ. Ա.-ին պատկանող ընկերությունում ստուգումների ժամանակ ավելացված արժեքի հարկի և շահութահարկի գումարների անհիմն նվազեցման փաստի արդյունքում առաջացած հարկային պարտավորություններն անտեսելու և դրանք չարձանագրելու դիմաց պահանջել և Ռ. Ա.-ից ստացել է 30.000 ԱՄՆ դոլար կաշառք»:

Եվ 40 հազար դոլար Հովսեփյանն ստացել է Ռ. Ա.-ից մեկ տարի անց: Ի՞նչ փուլում է այս գործը: Մեր տեղեկություններով, գործարար Ռուզան Աբրահամյանը եղել է Անդրանիկ Միրզոյանի մտերիմը, և Ռուզաննայի անունով Միրզոյանը «Տապիռո» անունով ընկերություն է գրանցել, ներկայում՝ սնանկ: Հետագայում, երբ ֆիրմայի գործերը վատացել են, Միրզոյանը Ռուզաննա Աբրահամյանին մենակ է թողել: Արդյոք գործը, որի մասին հաղորդագրություն է տարածվել, վերաբերո՞ւմ է Անդրանիկ Միրզոյանին, և ճի՞շտ է, որ Ռուզաննա Աբրահամյանի մասով գործը կարճվել է: Այս հարցերին ԱԱԾ մամուլի կենտրոնի ղեկավարի տեղակալ Գասպարյանը հարցով պատասխանեց. «Իսկ մեր հաղորդագրության մեջ կա՞ր Անդրանիկ Միրզոյանի անունը»: Իսկ քիչ անց նա հայտնեց, որ կարճման որոշում չկա, և քննությունը շարունակվում է: Սա այն գործն է, որի շրջանակներում անցյալ տարվա դեկտեմբերին ՀՔԾ նախկին պետի տանը խուզարկություն եղավ: Այն ժամանակ ՀՔԾ պետը կցկտուր պարզաբանում տվեց լրագրողներին առ այն, որ իր տան խուզարկությունը կատարվել է իր հարբեցող և խարդախ սանիկի զրպարտչական ցուցմունքների հիման վրա:

Երեկ մենք տեղեկություն ստացանք, որ Անդրանիկ Միրզոյանի սանիկի անունով ևս ընկերություն էր գրանցված, որի տանիքը նույն ինքը՝ Միրզոյանն էր: Անդրանիկ Միրզոյանի անունը կապվում է նաև մի հին պատմության հետ, որի մասին բոլորը մոռացել են, և որը հայտնի է որպես թղթի գործ: 2006 թվականին Նուբարաշենի բերդում կախվելու միջոցով ինքնասպան եղավ Նիկոլայ Ստեփանյանը, ով, իբր, թուղթ էր վաճառել հանրապետությունում հայտնի որոշ պաշտոնյաների տանիքի ներքո և հափշտակություններ կատարել: Նիկոլայ Ստեփանյանը հրաժարվեց ցուցմունքներ տալ նախաքննության մարմնին, որը ՀՔԾ-ն էր: Հետագայում նա կանչվեց դատախազություն և հանկարծ չպարզված ու խիստ կասկածելի հանգամանքներում մահացավ կալանավայրում: Մեր տեղեկություններով, այն ձեռնարկությունը, որն «աշխատում էր» Նիկոլայ Ստեփանյանի անվան տակ, ևս առնչվում է Անդրանիկ Միրզոյանի հետ: Երեկ մենք փորձեցինք նրանից անձամբ մեկնաբանություններ ստանալ և մեր տեղեկությունները հղկելու և ճշտելու, գուցե նաև հերքելու հնարավորություն, սակայն նա իր բջջայինը տվել էր վարորդին, ով էլ քաղաքավարի ձևով «ցրում» էր շեֆին զանգահարող լրագրողներին:

Սյուզան Սիմոնյան