Երեկ՝ մարտի 20-ին, մահվան ելքով վրաերթ է տեղի ունեցել Կոտայքի մարզում: Ժամը 20:30-ի սահմաններում Ճանապարհային ոստիկանության օպերատիվ կառավարման կենտրոն ահազանգ է ստացվել, որ Աբովյան- Մայակովսկի ավտոճանապարհին՝ Ռազմական ոստիկանության հարևանությամբ, վրաերթ է տեղի ունեցել: Ինչպես վրաերթի վայրից հայտնում է ֆոտոլրագրող Գագիկ Շամշյանը, օպերատիվորեն նշված վայր են ժամանել Ճանապարհային ոստիկանության 2-րդ սպայական գումարտակի 3-րդ վաշտի աշխատակիցները՝ գումարտակի հրամանատարի տեղակալ Դավիթ Ավագյանի և վաշտի հրամանատար Արթուր Պետրոսյանի գլխավորությամբ:

Տեղում է նաև ոստիկանության Կոտայքի բաժնի օպերատիվ խումբը: Պարզվել է, որ Կոտայքի մարզի Գեղաշեն գյուղի բնակիչ, 29-ամյա Համազասպ Մեհրաբյանը իր վարած ВАЗ 2106 մակնիշի 34 TՕ 741 համարանիշի ավտոմեքենայով վրաերթի է ենթարկել մի կնոջ, որը տեղում մահացել է: Ֆոտոլրագրողը հայտնում է, որ վարորդը փախուստի չի դիմել: Այս պահին նշված վայրում աշխատում են Հայաստանի քննչական կոմիտեի Կոտայքի մարզային քննչական վարչության քննիչները:

ՃՈ 2-րդ սպայական գումարտակի 3-րդ վաշտի հարմանատարի տեղակալ Երվանդ Ալեքսանյանի հանձնարարականով վարորդը տեղափոխվեց ոստիկանության Կոտայքի բաժին, որտեղից էլ քննիչի հանձնարարականով տեղափոխվել է բժշկական կենտրոն՝ պարզելու սթափության աստիճանը: Քննիչի հանձնարարականով ավտոմեքենան տեղափոխվում է ոստիկանության Կոտայքի բաժնի պահպանվող հատուկ տարածք: Ֆոտոլրագրողը հայտնում է, որ օպերատիվորեն են գործել նաև Աբովյանի բժշկական կենտրոնի դի տեղափոխող բրիգադի ծառայողները: Ոստիկանությունն ու քննչական բաժինը պարզում են մահացածի ինքնությունը:

***

21/03/2015 09:30

Ֆոտոլրագրողը հայտնում է՝ ոստիկանությունն ու քննչական բաժինը քննիչ Ա. Բալոյանի գլխավորությամբ պարզել են, որ մահացածը հանդիսանում էր Վանաձոր քաղաքի բնակիչ, 42-ամյա Անահիտ Սերոբյանը:

© shamshyan.com