«Լևոն Ամիրխանյան» ՍՊԸ նախագահ Համլետ Ամիրխանյանի ինքնասպանությունից հետո, որը տեղի ունեցավ փետրվարի 16-ին, ընկերության կառուցած էլիտարների բնակիչները սպասողական վիճակում են: Կառավարությունից խոստացել են օգնել նրանց՝ լուծելու բանկերի հետ առաջացած բարդությունները, և բնակարանների համար սեփականության վկայականներ տրամադրել: Հիշեցնենք, որ Ամիրխանյանը, պարտքերի մեջ խճճվելով, գրավադրել էր բնակարանները, և նրա մահից հետո բանկերը շենքերի բնակիչներից պահանջել են, որոնք տարիներով այդտեղ ապրում են, ազատել տները: Այն բանից հետո, երբ բնակիչների խումբը դիմեց կառավարություն և իրավապահ մարմիններին, բանկերի դիրքորոշումը մեղմացավ, դադարեցին պահանջներ ներկայացնել:

Խոսքը «Զարգացման հայկական բանկի», «Արդշինինվեստ»-ի, «Կոնվերսբանկի», «Նորվիկ կրեդիտ»-ի և այլ վարկային կազմակերպությունների մասին է: Բանկերի ներկայացուցիչները հանդիպում են բնակիչներին, փորձում բանակցել նրանց հետ, նաև վստահեցնում են, որ տեղյակ չեն եղել, որ «Լևոն Ամիրխանյան» ՍՊԸ-ի անունից գրավադրված բնակարանները փաստացի տերեր ունեն: Այս ամենից բնակիչները եզրակացրել են, որ «վերևներից» խոսել են բանկերի հետ: Եվ բանկերը, և բնակիչներն այժմ սպասում են սնանկության գործընթացի ավարտին: Այն սկսվել էր դեռևս Համլետ Ամիրխանյանի կենդանության օրոք՝ փետրվարի 9-ին: «Մարտի 3-ին տրվել է սնանկ ճանաչելու վերաբերյալ հայտարարություն, և, օրենքի համաձայն, սահմանվել է ժամկետ՝ պահանջների ներկայացման համար, մինչև ապրիլի 2-ը,- պատմեց «Լևոն Ամիրխանյան» ՍՊԸ սնանկության կառավարիչ Արման Սարգսյանը:- Հիմա պահանջների ներկայացման փուլն է: Ներկայումս չենք կարող ասել՝ պարտատերերը շատ կլինեն, թե ոչ, որովհետև պահանջներն ամեն օր ավելանում են: Այս պահի դրությամբ ունենք մոտ 30 պահանջ»:

Ըստ կառավարչի, պահանջատերերի թվում կան և կազմակերպություններ, և բնակարանատերեր, և գործողություններ են արվում ոչ միայն պարտքերի հաշվառման, այլև ակտիվների հայտնաբերման ուղղությամբ: «Թե ինչ գործողություններ, չասեմ, որովհետև դրանք լայնածավալ են, և խոսքը հասարակ կազմակերպության մասին չէ»: Ճի՞շտ են լուրերը, որ Ամիրխանյանի պարտքերն ավելի շատ են, քան նրա ունեցվածքը: Սնանկության կառավարիչը դժվարացավ պատասխանել. «Ես չէի շտապի նման հայտարարություն անել, որովհետև դրա համար պետք է շատ խորը վերլուծություններ կատարել, ուսումնասիրել բոլոր փաստաթղթերը: Ես աշխատում եմ փաստաթղթերի հետ և կարող եմ ասել, որ շատ վաղ է այս փուլում նման բան պնդել

Սյուզան Սիմոնյան