Երևանի քաղաքապետ Տարոն Մարգարյանն աշխատանքային հերթական խորհրդակցության ժամանակ, նախքան օրակարգային հարցերին անցնելը, մեկ անգամ ևս շնորհավորել է աշխատակազմի, ինչպես նաև բոլոր կանանց ու աղջիկներին կանանց միջազգային օրվա առթիվ և հղել իր բարեմաղթանքները: Մշակույթի և տուրիզմի վարչության պետը զեկուցել է, որ մարտի 8-ին մայրաքաղաքում անցկացված տոնական միջոցառումները մեկնարկել են «Զվարթնոց» օդանավակայանից, ապա շարունակվել բոլոր վարչական շրջաններում՝ իգական սեռի ներկայացուցիչներին շնորհավորական բացիկներ ու ծաղիկներ նվիրելով: Նաև զեկուցվել է, որ կազմակերպվել են ժամանցային տարբեր ծրագրեր և բացօթյա համերգներ:

Հայտարարված ժամանակացույցի համաձայն՝ այսօրվանից մեկնարկել է «Ձեզ համար, կանայք» խորագրով մեկամսյա առողջապահական ակցիան, որի շրջանակում 5 ուղղություններով կիրականացվեն անվճար հետազոտություններ, իսկ անհրաժեշտության դեպքում կկատարվեն նաև վիրահատական միջամտություններ: Քաղաքապետ Տարոն Մարգարյանը պատասխանատուներին հանձնարարել է պարբերաբար այցեր կազմակերպել բուժհաստատություններ և տեղում հետևել ակցիայի ընթացքին:

Բնապահպանության վարչության պետը զեկուցել է, որ մայրաքաղաքի կանաչապատման նախապատրաստական աշխատանքներն ավարտված են: Զեկուցվել է նաև, որ ապրիլի 1-ից կմեկնարկեն կանաչապատման հիմնական աշխատանքները: Ծաղկապատման հետ կապած էլ նշվել է, որ արդեն իսկ ներկրվել ու ծաղկաբաժակներ է տեղափոխվել 280 հազար ծաղկասածիլ, առաջիկայում կներկրվի ևս 500 հազարը: Քաղաքապետը հանձնարարել է հատուկ հսկողություն սահմանել ոռոգման համակարգերի անցկացման, մասնավորապես խորքային հորերի գործարկման համար անցկացվող մրցութային գործընթացների նկատմամբ՝ նախատեսված աշխատանքները հնարավորին սեղմ ժամկետում ավարտելու համար:

Երևանի հանրակրթական դպրոցներում առարկայական օլիմպիադաների քաղաքային փուլի ընթացքի հետ կապված հանրակրթության վարչության պետը զեկուցել է, որ 15 առարկաներից անցկացվող օլիմպիադաներն ավարտվել են, և արդյունքների ամփոփումից հետո հաղթողները կպարգևատրվեն: Նշվել է նաև, որ նախորդ տարիների համեմատ գրանցվել է մասնակցության աճ:

Քաղաքաշինության և հողօգտագործման ոլորտում նախորդ շաբաթ գրանցվել է ապօրինաշինության և հողազավթման 12 դեպք: Զեկուցվել է նաև, որ նախկինում հայտնաբերված 6 դեպքերի մասով իրականացվել են ապօրինի շինության քանդման աշխատանքներ:

Չնախատեսված վայրերում աղբ թափելու դեպքերը հայտնաբերելու նպատակով ամենօրյա հսկողության արդյունքում հայտնաբերվել և վարչական արձանագրություն է կազմվել 62 դեպքի մասով: Քաղաքապետ Տարոն Մարգարյանը, բավարար չհամարելով աշխատանքների ներկա ընթացքը, պատասխանատուներին և վարչական շրջանների ղեկավարներին հանձնարարել է առավել հետևողական լինել:

«Այս ուղղությամբ տարվող աշխատանքները գոհացուցիչ չեն: Հատկապես հանգստյան օրերին շրջելով քաղաքում՝ կտեսնեք այն պատկերն, ինչն ուղղակի անթույլատրելի է: Իսկ արդյունքի հասնելու համար պետք է ավելի խիստ և հետևողական մոտեցում: Ոլորտի այն աշխատակիցները, ովքեր կթերանան իրենց պարտավորությունների կատարման հարցում, պետք է նույնպես պատասխանատվության ենթարկվեն, որպեսզի ի վերջո հասնենք այն արդյունքին, որ այս մշակույթը ձևավորվի և ոչ սահմանված վայրում աղբ գցողներն անպատիժ չմնան: Աշխատանքներում ներգրավեք նաև երիտասարդ կամավորների»,- ընդգծել է քաղաքապետ Տարոն Մարգարյանը: Հանձնարարվել է ակտիվացնել աշխատանքները նաև տնտեսվարողների կողմից հարակից ընդհանուր օգտագործման տարածքների պարտադիր բարեկարգման ուղղությամբ:

Երևանի քաղաքապետարանի և վարչական շրջանների ղեկավարների աշխատակազմերում քաղաքացիների և պետական կառույցների կողմից փետրվար ամսվա ընթացքում ստացվել է 11 հազար 836 դիմում և գրություն: Բոլոր գրությունների պատասխանները դիմումատուներին տրամադրվել են սահմանված ժամկետում: Բացի այդ, զեկուցվել է, որ քաղաքապետարանում և վարչական շրջանների ղեկավարների աշխատակազմերում քաղաքացիների ընդունելություններին փետրվարին մասնակցել է 494 քաղաքացի: Բարձրացված հարցերի զգալի մասին տրվել են համապատասխան լուծումներ և սպառիչ պատասխաններ, իսկ 25 հարց դեռևս կատարման ընթացքում է:

«Երևան քաղաքի կառավարման տեխնոլոգիաների կենտրոն» ՓԲԸ տնօրենը զեկուցել է, որ մանկապարտեզներում հերթագրվող երեխաներին հաշվառելու էլեկտրոնային համակարգի ստեղծման աշխատանքները սկսված են: Փորձնական տարբերակով համակարգն առաջինը կներդրվի երկու մանկապարտեզներում:

Քաղաքապետ Տարոն Մարգարյանը հանձնարարել է աշխատանքներ տանել ապրիլի 1-ից մայրաքաղաքի բոլոր ցայտաղբյուրների և ապրիլի 7-ից շատրվանների գործարկման ուղղությամբ: Քաղաքապետը հանձնարարել է նախապատրաստվել նաև ապրիլի 11-ին մայրաքաղաքում հայտարարվելիք համաքաղաքային ծառատունկ-շաբաթօրյակի կազմակերպմանն ու պատշաճ անցկացմանը:

Խորհրդակցության ավարտին Նոր Նորք վարչական շրջանի ղեկավարը քաղաքապետին է ներկայացրել Երևանի և ՀՀ մարզերի միջև համագործակցության ծրագրի շրջանակում Գեղարքունիքի մարզ կատարած այցն ու արդյունքում ձեռք բերված պայմանավորվածությունները: Զեկուցվել է նաև, որ վարչական շրջանի և մարզի միջև ստորագրվել է համագործակցության հուշագիր: Քաղաքապետ Տարոն Մարգարյանը վարչական շրջանների ղեկավարներին հանձնարարել է շարունակել ակտիվ համագործակցությունը ինչպես ՀՀ մարզերի, այնպես էլ ԼՂՀ շրջանների հետ:

Երևանի քաղաքապետարանի տեղեկատվության
և հասարակայնության հետ կապերի վարչություն