«Փաստինֆո»-ին որոշ մանրամասներ են հայտնի դարձել Երևանի Նորք Մարաշ վարչական շրջանում փետրվարի 19-ին տեղի ունեցած ողբերգական ավտովթարի մասին:

Պարզվում է` ավտոմեքենայի վարորդը մի շարք բարդ առողջական խնդիրներ ունի, որոնք էլ, ամենայն հավանականությամբ, վթարի պատճառ են դարձել:

Հիշեցնենք, 2 օր առաջ, առավոտյան, ժամը 11:30-ի սահմաններում, Մարաշի Արմենակյան փողոցում «Volkswagengolf» մակնիշի ավտոմեքենան վրաերթի էր ենթարկել 4 հոգու` 82-ամյա Անահիտ Կարապետյանին, մանկասայլակի մեջ գտնվող 8 ամսական երկվորյակ տղաներին և նրանց մորը` 29-ամյա Աննա Հարությունյանին:

Վրաերթի հետևանքով երեխաներից մեկը մահացել է, մյուսը ծայրահեղ ծանր վիճակում է, երեխաների մայրն ու տարեց կենը ևս հիվանդանոցում են:

«Փաստինֆո»-ին հայտնի է դարձել, որ «Volkswagengolf» մակնիշի ավտոմեքենայի վարորդը` Նոր Նորքի բնակիչ Ռազմիկ Ավետիսյանն է, ով աշխատում է ՀՀ ԳԱԱ ֆիզիկայի կիրառական պրոբլեմների ինստիտուտում` որպես իրավաբան: Ռազմիկ Ավետիսյանը տառապում է էպիլեպսիա  հիվանդությամբ, տարիներ առաջ ինֆարկտ է տարել և սրտի բարդ վիրահատությունների ենթարկվել:

Իսկ դեպքի օրը, մեքենայի ղեկին` ընթացքի ժամանակ, վարորդի ինքնազգացողությունը վատացել է, նա կորցրել է գիտակցությունն ու մեքենայի կառավարումը, մեքենան դուրս է եկել մայթ ու վրաերթի ենթարկել հետիոտներին:

Ի դեպ, հիշեցնենք, ինչպես սովորաբար արվում է նման դեպքերում, դեպքի առթիվ հարուցվել է քրեական գործ՝ ճանապարհային երթևեկության և տրանսպորտային միջոցների շահագործման կանոնների խախտման և անզգուշությամբ մարդու մահ առաջացնելու հատկանիշներով:

Եվ, այդուհանդերձ, նախնական տեղեկությունների համաձայն` վարորդը ՃԵ որևէ խախտում թույլ չի տվել և ավտոմեքենան վարել է սահմանված արագությամբ: Սակայն կորցրել է գիտակցությունն ու իր կամքից անկախ ողբերգության պատճառ դարձել:

Իսկ ո՞վ է մեղավոր նման դեպքում, ո՞վ պետք է պատասխան տա կատարված անդառնալի ողբերգության համար:

Թերևս, պետությունն իր անկատար պետական համակարգով ու իրավական ակտերով: Այլապես, ինչպե՞ս է ստացվել, որ նման ակնառու առողջական խնդիրներով քաղաքացուն վարորդական իրավունք է տրամադրվել, նրան թույլ է տրվել նստել ավտոմեքենայի ղեկին, այն դեպքում, երբ այդ մարդու հետ իր կամքից անկախ ամեն վայրկյան ու ամենաանսպասելի վայրում կարող էր կատարվել այն, ինչ տեղի ունեցավ 2 օր առաջ Նոր Նորքում: