Նոր Նորքի 4-րդ զանգվածում փետրվարի 9-ի լուսադեմին իրեն և 9-ամյա որդուն սեփական բնակարանում բենզինով այրած և երեկ հիվանդանոցում մահացած 47-ամյա Աննա Բադալյանի ամուսինը՝ Կարեն Նահապետյանը, չի ցանկանում զբաղվել կնոջ հուղարկավորությամբ։ Այս մասին ասել է Աննա Բադալյանի ամուսինը՝ Կարեն Նահապետյանը։

«Ընկերներս ասում են, որ ես պիտի կազմակերպեմ թաղման արարողությունը, բայց հիմա ինձ միայն իմ երեխայի առողջությունն է հետաքրքրում, ես միայն այդ հարցով եմ զբաղվում, չգիտեմ՝ ոնց է լինելու»,-ասաց նա։

Կարեն Նահապետյանն նշեց, որ Աննան քույր, եղբայր չունի, մայրը մահացել է, հայրը վաղուց բաժանված էր, նրա հետ Աննան կապ չուներ, միայն մի քանի հեռու բարեկամներ ունի, որոնց հետ իր կապերը վաղուց խզել է։

Մահացած Աննայի ամուսնու քույրը՝ Կարինե Նահապետյանը, լրագրողի հետ զրույցում ասաց, որ երեխան իրենցից չի հարցրել մոր մասին, սակայն եթե հարցնի էլ, առայժմ չեն ասի, որ մայրն արդեն մահացել է։

«Երեխային հարցրեցի՝ կգա՞ս մեզ հետ ապրես, ասեց՝ հա, հետո էլ հարցրեց՝ ինձ չե՞ս ծեծի, ասեցի՝ դե գիտես, որ չէ»,- պատմեց Կարինե Նահապետյանը։

Նշենք, որ 47-ամյա Աննա Բադալյանը փետրվարի 10-ի լույս 11-ի գիշերը՝ 03.00-ի սահմաններում, մահացել է՝ շոկային վիճակից դուրս չգալով:

News.am