ՀՀ ազգային անվտանգության նախկին նախարար Դավիթ Շահնազարյանը՝ անդրադառնալով Գյումրիի սպանդի դեպքին, նշել է. «Գյումրիում կատարված սպանության զուտ իրավական կողմը եթե դիտարկենք, ապա պետք է արձանագրենք, որ առաջինը՝ Ավետիսյանների ընտանիքի սպանության գործով Ռուսաստանն իրավասու չէ դատավարություն անցկացնել: Որևէ դատավարություն կլինի բացարձակապես անօրինական: Երկրորդ. Ռուսաստանն իրավասու չէ վարել Գյումրիի սպանությունների գործով նախաքննությունը՝ նույն պատճառով: և երրորդ՝ քանի որ, ըստ պաշտոնական տեղեկատվությունների, Պերմյակովի նկատմամբ Հայաստան-Թուրքիա պետական սահմանը խախտելու փորձ անելու մեղադրանք չի ներկայացվել, ապա նրա ձերբակալությունը ռուս սահմանապահների կողմից եղել է անօրինական, որովհետև ռուս սահմանապահներն իրավունք ունեն ձերբակալել միայն նման փորձի դեպքում»:

Նրա համոզմամբ՝ «Ռուսաստանը կարող է օրինական նախաքննություն, հետագայում դատավարություն անցկացնել, սակայն զորամասը զինված և անօրինական լքելու մեղադրանքով ընդամենը»:

Շահնազարյանը համոզմունք է հայտնել, որ ՀՀ գլխավոր դատախազ Գևորգ Կոստանյանը չի դիմի ՌԴ գլխավոր դատախազին՝ Պերմյակովին հայկական կողմին հանձնելու պահանջով:

«Ներկայումս Ռուսաստանի հատուկ ծառայություններն են տիրապետում նախաքննության բոլոր լծակներին և կբեմադրեն ինչ-որ իրենց հարմար կլինի: Բայց ավելի քան վստահ եմ, որ հետագայում երբ Ռուսաստանում փոխվի քաղաքական իրավիճակը, ինչն անխուսափելի է, Հայաստանը հնարավորություն կունենա նորից նախաքննություն անցկացնելու»,-ասել է նա:

Շահնազարյանը նաև նշել է. «Ռուսական ռազմակայանի ղեկավարությունը անօրինական կերպով է Պերմյակովին պահում իր մոտ, ըստ էության նպաստելով, հանցագործության կոծկմանը, և խոչընդոտում է ՀՀ իրավապահների կողմից արդարադատության իրականացմանը: Այս առումով կարելի է մեղադրանք առաջադրել նաև հրամանատարությանը:

Առավոտ