Ստրասբուրգում, Մարդու իրավունքների եվրոպական դատարանում այսօր՝ հունվարի 28-ին, տեղական ժամանակով 09:15-ին (Երեւանի ժամանակով 12:15-ին) տեղի կունենա «Փերինչեքն ընդդեմ Շվեյցարիայի» գործով նիստը:

«Փերինչեքն ընդդեմ Շվեյցարիայի» (Perincek v. Switzerland, App. no. 27510/08) գործում Հայաստանը ներգրավված է՝ որպես երրորդ կողմ: Գործում որպես երրորդ կոմղ ներգրավված է նաեւ Թուրքիան:

Հայաստանից պատվիրակության կազմում ընդգրկվել են Գլխավոր դատախազ Գեւորգ Կոստանյանը, նրա տեղակալ Էմիլ Բաբայանը, Արդարադատության նախարարի տեղակալ Արման Թաթոյանը: Նրանցից բացի՝ մեր երկիրը շահերը ՄԻԵԴ-ում կպաշտպանեն միջազգային հայտնի փաստաբաններ Ջեֆրի Ռոբերթսոնը, Ամալ Ռամզի Քլունին, Թոբի Քոլիսը: Նախատեսվում է, որ Հայաստանը ներկայացնող վեց փաստաբաններն էլ ելույթով հանդես կգան:

Մինչ այդ հայկական կողմը գրավոր կերպով ՄԻԵԴ-ի Մեծ պալատին ներկայացրել է գործով իր դիրքորոշումը, իսկ հունվարի 28-ի նիստին հնարավորություն կունենա նաեւ բանավոր ելույթ ունենալու:

Նշենք, որ 2008 թվականին Շվեյցարիայի դատարաններից մեկը Հայոց ցեղասպանությունը ժխտելու համար  դատապարտել էր Թուրքիայի Աշխատավորական կուսակցության առաջնորդ Դողու Փերինչեքին։

Փերինչեքը դիմել էր ՄԻԵԴ և նախորդ տարի դեկտեմբերին ՄԻԵԴ-ը բավարարել է Փերինչեքի հայցն ընդդեմ Շվեյցարիայի։

Շվեյցարիան բողոքարկել է ՄԻԵԴ-ի որոշումը, որից հետո Հայաստանը դիմել է ՄԻԵԴ եւ հանդես է գալիս որպես 3-րդ կողմ։

NEWS.am