«Դատարանը ոչինչ չարեց օբյեկտիվ ճշմարտությունը պարզելու համար»,- այսօր լրագրողների հետ հանդիպմանը հայտարարեց Վարդան Պետրոսյանի փաստաբան Նիկոլայ Բաղդասարյանը` հիշեցնելով, որ դատարանը մերժեց կրկնակի դատաավտոտեխնիկական փորձաքննություն իրականացնելու միջնորդությունը, իսկ փորձագետի հարցաքննության ժամանակ, փաստաբանի խոսքով, «միտումնավոր խոչընդոտում էր հարցաքննությանը»:

«Ցանկացած իմ հարցը, որով կպարզվեր, թե որտեղ է վթարը տեղի ունեցել, դատարանը հանում էր՝ պատճառաբանելով, որ դա լրացուցիչ փորձաքննության հիմք է, և նախորդ փորձագետներն այդ հարցի վերաբերյալ հետազոտություն չեն արել, դրա համար էլ չեն կարող պատասխանել»,- ասաց Նիկոլայ Բաղդասարյանը:

Վարդան Պետրոսյանի՝ ֆրանսիացի դատապաշտպան Մարի Դոզեն էլ անդրադառնալով դատավարությանը՝ հետևյալ կարծիքը հայտնեց. «Վարդան Պետրոսյանի գործով ձգվող մեկ տարվա դատավարությունը ձևական էր, որովհետև հնչած մեղադրական ճառը մեկ տարի առաջ ներկայացված մեղադրական ակտի copy-past-ն էր»:

«Տպավորությունն այնպիսին է, որ դատավարության ընթացքում քննվել են հարցեր, որոնք որևէ բանի չեն ծառայելու, պարզապես տպավորություն են ստեղծել, որ դատաքննություն է տեղի ունենում, վկաներ են հանդես գալիս, սակայն մարդուն արդարացնող նրանց նշած որևէ փաստարկ հաշվի չի առնվում»,- ասաց ֆրանսիացի փաստաբանը:

Ինչ վերաբերում է դատական նախորդ նիստում մեղադրող դատախազ Արթուր Սարգսյանի պահանջած 6.5 տարվա ազատազրկմանը, Մարի Դոզեի խոսքով, այդ պատժաչափն ուղղակի հիմնազուրկ է:

«Մեղադրական ճառում որևէ տող, նույնիսկ ստորակետ չտեսա, որով հիմնավորվում է, թե ինչու է այդ պատժաչափը պահանջվել»,- ասաց նա: