Դերասան Վարդան Պետրոսյանի և տուժող Հակոբյանների միջև  քաղաքացիական հայցի շուրջ համաձայնության գալու դեպքում այսօր հնարավոր է դատավճիռ կայացվի։ Այս մասին այսօր՝ հունվարի 16-ին, ասաց տուժող կողմի փաստաբան Ռուբեն Բալոյանը։

«Մենք քաղաքացիական հայց ենք ներկայացրել, որ Տաթևիկ Հակոբյանի բուժման համար Վարդան Պետրոսյանը վճարի 10.5 միլիոն դրամ, իսկ դատական ծախսերի համար 2.5 միլիոն դրամ, բայց հիմա պատրաստ ենք նվազեցնել մեր նշած գումարը, որպեսզի կողմերը համաձայնության գան»,-ասաց փաստաբանը։

Ռուբեն Բալոյանը նաև նշեց, որ  կողմերի միջև համաձայնության գալու դեպքում ինքը պատրաստ է հրաժարվել իր այն միջնորդությունից, որ Առողջապահության նախարարության կողմից ստեղծվի հանձնաժողով Տաթևիկ Հակոբյանի բուժման հետ կապված հարցերի մասին եզրակացություն տալու համար։

Նշենք, որ դատարանը Վարդան Պետրոսյանին դեռ չի ճանաչել քաղաքացիական հայցվոր։ Ավելի վաղ տուժող կողմը Վարդան Պետրոսյանին քաղաքացիական հայց էր ներկայացրել, ըստ որի դերասանից պահանջում էին 10.5 միլիոն դրամ վճարել Տաթևիկ Հակոբյանի բուժման ծախսերն ապահովվելու համար, իսկ 2.5 մլն դրամ դատական ծախսերի համար։

Հիշեցնենք, որ ըստ մեղադրական եզրակացության՝ Վարդան Պետրոսյանը 2013թ. հոկտեմբերի 20-ին, ժամը 22:10–ի սահմաններում, Կոտայքի մարզի Սարալանջ գյուղի կողմից դեպի Երևան ուղղությամբ վարելիս «ԲՄՎ-320» մակնիշի մեքենայով բախվել է «Վազ 21214» մակնիշի մեքենայի հետնամասին։ Վթարի հետևանքով «Վազ-21214» մակնիշի մեքենայի ուղևորներ Էդվարդ և Էդգար Հակոբյանները մահացել են, ուղևորներ Տաթևիկ Հակոբյանը, Հայկ Հակոբյանը, էմմա Հակոբյանը, ինչպես նաև վարորդ Արթուր Հակոբյանն ստացել են վնասվածքներ: Վարդան Պետրոսյանին մեղադրանք է առաջադրվել ՀՀ քրեական օրենսգրքի 242-րդ հոդվածի 3-րդ մասի հատկանիշներով՝ «Ճանապարհային երթևեկության կամ տրանսպորտային միջոցների շահագործման կանոնները խախտելը,  որն անզգուշությամբ առաջացրել է երկու կամ ավելի մարդու մահ»։ Տուժող կողմը փորձում է ապացուցել, որ Վարդան Պետրոսյանը վթարի պահին եղել է ալկոհոլի ազդեցության տակ և գերազանցել է թույլատրելի արագությունը։ Դերասանը հերքում է այդ վարկածը և իրեն հերթին փորձում է ապացուցել, որ տուժող կողմի մեքենան կայանած է եղել ոչ թե ճանապարհի կողնակին, այլ երթևեկելի գոտում, ունեցել է անսարքություններ։

news.am