Գյումրիում այսօր տեղի ունեցած ողբերգությունից նոր մանրամասներ են հայտնի դարձել: Լրատվամիջոցներին հաջողվել է ճշտել սպանվածների ինքնությունը: Գնդակահարվել են՝ հայր, մայր, որդի, հարս, երկու երեխա, մեկ վեց ամսական երեխան վիրավոր հիվանդանոցում է։ Վիրավոր երեխան դանակով է վիրավորված, գտնվում է Գյումրու մանկական ավստրիական հիվանդանոցում։ Երկու սպանված երեխաներից մեկը չափահաս էր։ Մյուսը օրորոցում է գնդակահարվել։

Դեպքի վայրում 200-ից ավելի ոստիկան կա։

Նախնական տեղեկություններով՝ սպանողը ռուս զինվորական է, որը ծառայում էր ռուսական ռազմակայանում:

Գյումրի «Ասպարեզ» ակումբի նախագահ Լևոն Բարսեղյանը, որը զրուցել է տանտիրուհու քրոջ հետ, Tert.am-ին նոր մանրամասներ է ներկայացրել Գյումրիում սպանված ընտանիքի և դեպքի մասին.

«Առավոտյան տանտիրուհու քույրը ժամը 10-ի կողմերը հյուր է եկել, դուռը բաց է եղել, մտել, տեսել է, որ գնդակահարված են բոլորը, վեց ամսական երեխան՝ վիրավորված, որին հետո տարել են հիվանդանոց: Տեսել է քրոջը, որի երեսը լրիվ ջնջխված է եղել, հետո տեսել է վերմակների տակ գնդակահարված են բոլորը: Հարևանուհին էլ գիշերը ժամը 6:20 –ին երեխայի ձայն է լսել, մտածել է՝ թեթև  երկրաշարժ է»:

Ընտանիքի հայրը մեկնած է եղել արտագնա աշխատանքի:

Ինչ վերաբերում է սպանություն կատարած անձին, ապա քաղաքում տարբեր խոսակցություններ են պտտվում, բայց նա դեռ հայտնաբերված չէ:

Ըստ Բարսեղյանի՝  մոտ 1000-ից ավելի մարդ է հավաքվել շենքի մոտ, որտեղ այսօր առավոտյան տեղի է ունեցել ողբերգությունը։ Շենքի մոտ նաև բազմաթիվ ոստիկաններ կան:

Լուսանկարները՝ blognews.am