ԵՏՄ շրջանակներում մեր բոլոր տնտեսվարողները կարող են մասնակցել ԵՏՄ անդամ պետությունների կողմից կազմակերպվող պետական գնումների գործընթացներին, և ԵՏՄ անդամ մյուս երկրներն էլ կարող են մասնակցել մեր պետական գնումների գործընթացին:

Այս մասին այսօր ապրանքների արտահանմամբ և ներկրմամբ զբաղվող տնտեսվարողների հետ հանդիպման ժամանակ ասաց ՀՀ Տնտեսական մրցակցության պաշտպանության պետական հանձնաժողովի նախագահ Արտակ Շաբոյանը:
«Հայաստանի գործատուների հանրապետական միության» նախագահ Գագիկ Մակարյանը մտահոգություն հայտնեց, որ ԵՏՄ անդամակցությունից հետո գործատուները կարող են արհեստականորեն հայտնվել անբարեխիղճ մրցակցության պայմաններում, քանի որ մինչ այդ այլ պայմաններում են գործում, դրանից հետո պետք է գործեն այլ պայմաններում:

Նա նկատեց, որ միջազգային մրցույթների շրջանակում մինչ այդ էլ մեր ընկերությունները կարող էին մասնակցել պետական գնումների գործընթացին և հարց բարձրացրեց, թե տարբերություններ լինելո՞ւ են ԵՏՄ երկրների շրջանակում անցկացվող մրցույթների հարցում:

Արտակ Շաբոյանը պատասխանեց, որ պետական գնումների գործընթացին ԵՏՄ անդամ երկրների հավասար իրավասություններ ունեցող ընկերություններ են մասնակցելու: «Մեզ միակ մտահոգող խնդիրը պետք է լինի արդար և անաչառ գնումների գործընթացը»,-ասաց նա և խոստացավ այդ հարցում հետևողական լինել:
ՏՄՊՊՀ նախագահը նշեց,որ թեև մեծ հաշվով մեր օրենսդրությունը համահունչ է ԵՏՄ-ին, սակայն որոշ փոփոխություններ կլինեն ազգային օրենսդրությունում:

«Մենք շատ լավ հասկանում ենք, որ ԵՏՄ անդամակցությունը կարևոր դեր ու նշանակություն է ունենալու, և ամեն ինչ անելու ենք՝ օգնելու մեր տնտեսվարողներին, խորհրդատվություն ենք տրամադրելու»,-ասաց նա և նշեց, որ ամենակարևորը ԵՏՄ շրջանակներում մեր տնտեսվարողների շահերի պաշտպանված լինելն է:

tert.am