Հղի կանայք այլևս 10-20 մլն դրամանոց նպաստներ չեն ստանա: Այս մասին այսօր Աժ-ում, ներկայացնելով «Ժամանակավոր անաշխատունակության նպաստների մասին» ՀՀ օրենքում Կառավարության առաջարկած լրացումներն ու փոփոխությունները, հայտարարեց Աշխատանքի և սոցիալական ապահովության նախարար Արտեմ Ասատրյանը:

Այս նախագծով կառավարությունն առաջարկում է 2015 թվականից սահմանել առավելագույն շեմ 1 մլն դրամ:

«Այսինքն` 4.6 մլն դրամից ավելի նպաստ չի կարող վճարվել»,- ասաց Արտեմ Ասատրյանը` նկատի ունենալով այն հանգամանքը, որ նպաստը տրվելու է 4.5 ամիս ժամկետով: «Դրանից ավել կարող է վճարել գործատուն, եթե նման պայմանագիր է կնքել աշխատող կնոջ հետ»,- ասաց նախարարը:

Նա նաև նշեց, որ պաշտոնական տեղեկատվության համաձայն՝ շուրջ 110 000 աշխատող կանանց 99.65 %-ը կստանան 100 % փոխհատուցում, քանի որ նրանց աշխատավարձը չի գերազանցում սահմանված առավելագույն շեմը, իսկ 1 մլն դրամից ավելի աշխատավարձ ՀՀ-ում ստանում է շուրջ 40 կին:

Ի դեպ, նախարարը նաև տեղեկացրեց, որ նախագծի քննարկումների արդյունքում օրենքի նախագծից դուրս են բերվել դրույթները, որոնց համաձայն՝ ստաժն ազդում էր հղիության նպաստի չափի վրա:

Ինչ վերաբերում է չաշխատող մայրերին, ապա կառավարությունը որոշել է նրանց հղիության նպաստ վճարել նվազագույն աշխատավարձի 50 տոկոսի չափով: Նույն չափը ամրագրվել է նաև որպես նվազագույն նպաստի չափ:

Այսինքն` ոչ մի կնոջ չի կարող դրանից ցածր նպաստ վճարվել: Որոշվել է նաև, որ երեխայի ծննդյան միանվագ նպաստ կտրվի կնոջը նաև երեխայի մահացած ծնվելու դեպքում:

Օրենքի նախագիծը սահմանում է նաև հիվանդության նպաստի չափը: Այն պետք է կազմի աշխատավարձի 80%-ը, ընդ որում` 1 օրը չի վճարում, հաջորդ 5 օրերը վճարվում են գործատուի կողմից, իսկ դրանից հետո` պետական բյուջեից:

Արտեմ Ասատրյանի խոսքով՝ պաշտոնական վիճկագրությունը վկայում է, որ հիվանդության արձակուրդը տևում է շուրջ 19 օր: