Ընդդիմադիր քաղաքական գործիչ Գուրգեն Եղիազարյանը կարծում է, որ եռյակի սկսած գործընթացը ժամանակի պահանջն է, սակայն միաժամանակ մտահոգված է ռուսական մամուլի արձագանքներից, թե հանրահավաքն ուղղված է Մաքսային միության դեմ։
Tert.am-ի հետ զրույցում Եղիազարյանը կարծիք հայտնեց, թե սա նման է դիվերսիայի, որն արվում է «Ժառանգության» միջոցով։ «Ես եռյակի հետ հույսեր չեմ փայփայում, բայց երկյակի՝ ՀԱԿ-ի և ԲՀԿ-ի վրա հույս ունեմ, և դրա մասին ասել եմ, որ ժամանակն ուղղումներ կմտցնի, սա իմ կարծիքն է։ Չի կարելի ժողովրդի ոչնչացումն ուղղել մի բանի, որը որևէ կապ չունի, կոնկրետ Մաքսային միության հետ, սա ավելի շատ նման է դիվերսիայի»,- ասաց նա՝ հիշեցնելով ռուսական մամուլի հրապարակումն այն մասին, որ ավելի քան 20 000 ընդդիմադիր դեմ էր դուրս եկել ՄՄ-ին, ինչը, սակայն մեր զրուցակիցը պնդեց, թե բացարձակ սուտ է, չնայած Րաֆֆի Հովհաննիսյանի՝ Մաքսայինին դեմ ելույթին։
«Հետևելով ելույթներին՝ հասկացա, որ այնտեղ օգտագործվում է «Ժառանգության» ֆակտորը և Րաֆֆի Հովհաննիսյանի ելույթը»,- ասաց նա և հավելեց, որ եթե Րաֆֆի Հովհաննիսյանը նույն ոգով շարունակի և« համաժողովրդական շարժումն իր ողջ թափով օգտագործի իր ցանկությունների դերակատարության համար, ապա չարաչար կսխալվի, և, ի վերջո, մյուս երկու ուժերը նրան կասեն՝ ոչ։
«Համենայն դեպս ես այդպես եմ սպասում, որ հաջորդ հանրահավաքին նա նման հարցեր չի արծարծի։ Հանրահավաքը ՄՄ-ի դեմ ուղղված չէ, հանրահավաքն ուղղված է այս խայտառակ իրականությանը, ինչի մեջ մենք ապրում ենք»,- ասաց նա։
Հարցին, թե հնարավոր է, ըստ այդ տրամաբանության, եռյակի ևս մեկ ուժ տրոհվի, Գուրգեն Եղիազարյանը պատասխանեց. «Ես կարող եմ միանշանակ իմ կարծիքն ասել, որ եթե նա նույն ոգով շարունակի, ինձ թվում է, որ եռյակի հետ այդ կարգավիճակով ճանապարհ չունի անցնելու»։
Իսկ հարցին, թե երկյակի ելույթներում հակասական կարծիքներ չկան, պատասխանեց. «Ամեն ինչ ավելի քան հստակ է, ավելին՝ իմ կարծիքով Սերժ Սարգսյանն էլ է ընդդիմադիր արդեն։ Ես ձեզ հիմա հայտնություն եմ ասում, որ Սերժ Սարգսյան ինքն էլ է ընդդիմության անդամ և ինքն էլ է հասկանում, որ այսպես չի կարող երկիրը կառավարել»,- ասաց նա։
Գուրգեն Եղիազարյանը ամեն դեպքում չի համարում, թե սա հերթական շարժումն է, որը հաջորդում է 2008թ-ի սկսած շարժմանը։ «Իշխանությունները հենց այդ ժամանակ իրենց գառան դիմակը պատռեցին, ասելով որ մենք գառների հետ գործ չունենք, այլ գործ ունենք կատաղած գայլերի ոհմակի հետ»,- ասաց նա։
Նախկին ՀԱԿ դաշինքի անդամը նշեց, թե ինքը կողմ է լինելու ցանկացած քայլի, որը կնախաձեռնի ՀԱԿ-ը։ Մեր դիտարկմանը, թե այսինքն՝ եթե Լևոն Տեր-Պետրոսյանի որոշումն է, ուրեմն այլևս քննության ենթակա չէ, Եղիազարյանը պատասխանեց. «Ոչ թե քննության ենթակա չէ, այլ Լևոն Տեր-Պետրոսյանն այս ողջ ընթացքում ապացուցել է, որ լրջագույնս մտահոգված է մեր երկիր ապագայով»։
Իսկ հարցին,թե այդ դեպքում ինչու չի մասնակցում գործընթացին, պատասխանեց. «Այնտեղ երեք կուսակցություններ էին մասնակցում, որից մեկին՝ «Ժառանգությանը», ես անընդհատ քննադատել եմ և հիմա ես չեմ իմանում, ինֆորմացիա չունեմ «Ժառանգության» և մյուսների մասին, գաղափար անգամ չունեմ, եթե գաղափար չունեմ, ինչպե՞ս պետք է մասնակցեմ»։

Թերթ.am