Վերաքննիչ քրեական դատարանում, այսօր Արմեն Դանիելյանի նախագահությամբ (դատավորներ Արշակ Խաչատրյան և Լիլիթ Թադևոսյան ) Գրիգոր Կյուրեղյանի գործով հերթական դատական նիստն էր:

Ըստ դատավճռի՝ Գրիգոր Կյուրեղյանը Lemon loung cafe սրճարանի դիմաց իր մոտ ապօրինի պահվող՝ գործով չպարզված հրազենով 9 անգամ կրակել է Վ.Հովհաննիսյանի ուղղությամբ՝ վերջինիս առողջությանը դիտավորությամբ պատճառելով ծանր վնաս։

Արձակված մյուս գնդակներն անդրադարձվել են ճանապարհի ասֆալտե ծածկույթից և սլացել տարբեր ուղղություններով՝ իրական վտանգ ստեղծելով տարածքում հավաքված մարդկանց կյանքի համար:

Գործը քննվել է Արաբկիր և Քանաքեռ-Զեյթուն, Առաջին ատյանի դատարանում:

Վերաքննիչ քրեական դատարանում այս գործով դատական նիստերը, մեղմ ասած, հանգիստ չեն անցնում: Այս անգամ էլ դատարանի առաջ մի հոծ բազմություն էր հավաքվել: Մոտ 40 հաղթանդամ տղամարդիկ սպասում էին նիստի սկսվելուն:

Վերջապես ներս թողեցին, և բոլորն անցան դահլիճ: Թե ինչպես այդ մոտ քառասուն տղամարդը տեղավորվեցին ընդամենը չորս նստարանի վրա, երևակայել է պետք. մի քանիսը պարզապես իրար գիրկ էին նստել: Մեկը մյուսին ասում է՝ «ախպե’ր, հո ծանր չե՞մ»:

«Ընկե’ր, իշաոտնուկ չկա՞ բերեք, նստեք»,- խոսակցությանը խառնվեց մեկ ուրիշը:

Մինչ դատարանի դահլիճը «բեսետկայի» էր վերածվել, ու մարդիկ կատակում էին դեսից դենից` բերեցին նաև ամբաստանյալին:

Վերջապես դատական նիստը սկսվեց, սակայն առանց մեղադրող կողմի և պաշտպանի:
Ամբաստանյալ Գրիգոր Կյուրեղյանն էլ հրաժարվեց առանց իր պաշտպանի մասնակցել դատական նիստին:

Դատարանը ստիպված էր նոր օր նշանակել: Բայց օր որոշելն էլ այս նիստին մի իսկական կոմեդիայի վերածվեց: Երկու դատավորները «թաքնվեցին» նախագահող դատավորի հետևում, քննարկեցին, հետո, հավանաբար, զգացին, որ իրենց քայլը կոռեկտ չէ, սկսեցին բարձր քննարկել.

-Ախպեր, դիր 16-ին, չես խանգարում,- դատավոր Արշակ Խաչատրյանի առարկությանը պատասխանեց դատավոր Լիլիթ Թադևոսյանը:

-Ամբաստանյալ, քեզ հարմա՞ր ա:

-Հարմար ա, հո տնից չեմ գալիս, որ հարմար չլինի,- եղավ պատասխանը:

Հռիփսիմե Գալստյան