Ամբողջ կեանք մը իմաստաւորողը՝ այն ԱԿՆԹԱՐԹՆԵՐՆ են, որոնք յանկարծօրէն կու գան, անակնկալ կը յայտնուին, յոյզ կու տան մտքին ու սրտին, սլացք՝ երեւակայութեան, թեւ ու թռիչք՝ հոգիին….Կը կերպարանափոխուինք, կը պայծառակերպուինք, հոգեւոր նոր վերելքներ կը նուաճենք….ԿԱԽԱՐԴԱԿԱՆ ԱԿՆԹԱՐԹ, որ հողակպիկ կեանքը կը դարձնէ ոգեղէն ու լուսեղէն….Բանաստեղծը պիտի ըսէր. «Կա՛նգ առ, ակնթարթ, Գեղեցիկ ես դու»….

***

ՄԵՐ ՈՍԿԵՂԵՆԻԿ ՄԱՅՐԵՆԻՆ…., որուն քաղցր հնչիւններուն ներքոյ բացինք մեր աչքերը աշխարհին, անոր բառերուն համովն ու հոտովը հասակ առինք ու մեծցանք, անով զգացինք, միտք ածեցինք, լացինք ու հրճուեցանք….Ան դարձաւ մեր էութիւնը, աշխարհը զգալու եւ ապրելու մեր կերպը, մեր հոգին, մեր անկողոպտելի գանձը….Մայրենի քաղցրիկ լեզու, ամէն օր, ամէն ժամ կը վայելեմ քու հիւթեղ բառերդ, «որք քիմքս կ’օծեն…կը սփոփեն հոգիս», կը հարստացնեն, կը լիացնեն զիս….Դուն ես մեր ինքնութիւնը, դարէ-դար մեզի փոխանցուած ա՛յն միակ հարստութիւնը, զոր չկրցաւ մեզմէ խլել թշնամին….ՄԵՐ ՄԵԾԱՍՔԱՆՉԸ..

Երան Գույումջյանի ֆեյսբուքյան էջից