ՀՀ վարչապետ Հովիկ Աբրահամյանն, այսօր լրագրողների հետ զրույցում, խոսել է  պարտադիր սոցիալական վճարի  և «պարտադիր կուտակայինի» տարբերության մասին:

Նա՝ դրանք նույնացնող անձանց խորհուրդ է տվել «այլ ակնոցով նայել» իրականությանը:

«Մենք, գիտենք, որ հուլիսի 1-ից բարձրացնելու ենք 200.000-ից ավելի պետական աշխատողների աշխատավարձեր, միջինը՝ 40 տոկոս, և կառավարությունը համարձակ քայլ է իրականացրել ՝ մոտ 38 միլիարդ հատկացրել է այդ աշխատավարձերի բարձրացմանը: Միաժամանակ, պետական հատվածի համար նպատակային սոցիալական վճար է սահմանվում և դա, իմ կարծիքով, շատ ճիշտ քայլ է»,-նշել է Հովիկ Աբրահամյանը:

Վարչապետի խոսքով,  մասնավոր ոլորտի համար դա մինչև 2017 թվականը հետաձգված է, իսկ հուլիսի 1-ից մնացածի համար կդառնա պարտադիր:

Այն հարցին, թե իր պաշտոնավարման ժամանակահատվածում քանի՞ գործարար է դուրս եկել ստվերից, Հովիկ Աբրահամյանն ասել է. «Մեր արդյունքները մենք կգրանցենք հուլիսի 1-ին: Ֆինանսների նախարարությունը կներկայացնի հաշվետվություն նաև հանրությանը, թե որ հարկատուի մոտ ինչ տենդենց կա. վճարումնե՞րն են ավելացրել, հարկերը, և այդ բոլորից նաև մամուլը տեղյակ է լինելու»։