Հայաստանի Հանրապետության ոստիկանությունը իրազեկում է մասնավոր պահնորդական ծառայություններ մատուցող բոլոր կազմակերպություններին, որ 2014 թվականի հուլիսի 1-ից ուժի մեջ է մտնելու ՀՀ կառավարության 2012 թվականի օգոստոսի 30-ի «Մասնավոր պահնորդական գործունեության լիցենզավորման կարգը, լիցենզիա ստանալու մասին հայտի և լիցենզիայի ձևերը հաստատելու մասին» թիվ 1152-Ն որոշումը:
Նշված որոշմամբ սահմանված կարգով, ս/թ հուլիսի 1-ից Հայաստանի Հանրապետության տարածքում մասնավոր պահնորդական ծառայություններ մատուցող բոլոր կազմակերպությունները լիցենզավորման նպատակով կարող են դիմել Հայաստանի Հանրապետության ոստիկանություն` ներկայացնելով հետևյալ փաստաթղթերը.
1. Հայտ, որի ձևը սահմանված է որոշման N 2 հավելվածով,
2. պահնորդի և (կամ) թիկնապահի՝ համապատասխան որակավորման ստուգումը հավաստող փաստաթղթի, ինչպես նաև այդ անձանց անձնագրերի և նրանց հետ կնքված աշխատանքային պայմանագրերի պատճենները:
«Պետական տուրքի մասին» ՀՀ օրենքի 19.5 հոդվածի 1-ին կետով սահմանված պետական տուրքը վճարելիս խնդրում ենք հիմք ընդունել «Լիցենզավորման մասին» ՀՀ օրենքի 23.5 հոդվածը:
Փաստաթղթերի փաթեթը հայտատուի հայեցողությամբ առձեռն հանձնելու դեպքում` դրանք ներկայացնել հետևյալ հասցեով` Հայաստանի հանրապետության ոստիկանություն, ք. Երևան, Նալբանդյան 130:
Մասնավոր պահնորդական գործունեության լիցենզավորման կարգի, պայմանների և այլ տեղեկություններ ստանալու համար կարող եք զանգահարել 59 68 31 հեռախոսահամարով: