Վարդան Պետրոսյանի նկատմամբ կիրառված խափանման միջոցը փոխելու վերաբերյալ նրա՝ ֆրանսիացի փաստաբան Մարի Դոզենի ներկայացրած միջնորդության վերաբերյալ թե’ մեղադրող դատախազ Արթուր Սարգսյանը և թե’ տուժողների շահերի պաշտպան Ռուբեն Բալոյանը բացասական կարծիք հայտնեցին:

Փաստաբան Ռուբեն Բալոյանն իր խոսքում նշեց, որ իր համար անհասկանալի մնաց, թե իր ֆրանսիացի գործընկերոջ ելույթը միջնորդությու՞ն էր, առարկությու՞ն, թե` պաշտպանական ճառ: «Ես կասեի, որ դա բարոյական հորդոր էր, ինչ-որ դաստիարակչական նպատակ էր հետապնդում»,- ասաց Ռուբեն Բալոյանը:

Նա նաև նշեց, որ պաշտպանն իր ելույթում գնահատականներ տվեց դեռևս չհետազոտված ապացույցներին, ինչ-որ անձանց ցուցմունքներին: «Ի վերջո, ես չեմ կարծում, որ պաշտպանական կողմը դատաքննության սկզբնական փուլում իրավունք ուներ նման դիրքորոշում հայտնելու»,- ասաց Ռուբեն Բալոյանը:

Փաստաբանն անդրադարձավ նաև պաշտպանական կողմի այն դիտարկմանը, թե կան ավտովթարի գործեր, որտեղ չկան միավորներ: «Ես կարող եմ հայտարարել, որ սա այդ գործը չէ»,- ասաց նա՝ հավելելով. «Մեղավոր կարող էր չլինել միայն այն դեպքում, եթե խափանված լիներ ամբաստանյալի ավտոմեքենայի արգելակման  համակարգը»:

Ռուբեն Բալոյանը նշեց նաև, որ գործում առկա են ապացույցներ, փաստաթղթեր, որոնք պաշտպանական կողմը փորձում է շրջանցել: «Բացի այդ, մենք գտնում ենք, որ թե նախաքննության և թե դատաքննության ընթացքում ամբաստանյալը խոչընդոտում է գործի քննությանը: Դրա վառ ապացույցն էր Եղվարդի ԲԿ բժշկի կողմից թույլ տրված սթափության վիճակի արձանագրությունները կազմելիս բազում սխալները, միգուցե և՝ ապօրինությունները»,- ասաց Բալոյանը` հավելելով, թե իր ունեցած փաստերն այսքանով չեն սահմանափակվում, բայց նա դրանց չանդրադարձավ, քանի որ այդ ապացույցները դեռ հետազոտված չեն:

Հաշվի առնելով հենց գործի ընթացքին խոչընդոտելու հանգամանքը՝ Ռուբեն Բալոյանը տեսակետ հայտնեց, որ Վարդան Պետրոսյանի փաստաբանի` կալանքը փոխելու միջնորդությունը դատարանը պետք է մերժի:

Մեղադրող դատախազն իր խոսքում ևս նույն տեսակետը հայտնեց` նշելով, որ կալանքի որոշման համար մասնավորապես հիմք է ընդունվել Վարդան Պետրոսյանի կողմից տուժողների նկատմամբ հնարավոր ճնշումների և ՀՀ-ից հեռանալու հավանականությունը:

Մեղադրող դատախազի այս հայտարարության համար Վարդան Պետրոսյանն իր խոսքում շնորհակալություն հայտնեց՝ հավելելով, որ առաջին անգամ լսեց այն դրույթները, որոնց համար ինքը կալանավորվել է:

Անդրադառնալով իր` երկրից փախչելու հնարավորությանը` վարդան Պետրոսյանն ասաց. «Հարգելի դատարան, Դուք շատ լավ գիտեք, որ անձնագրերս Ձեզ մոտ են, ճանաչում եք ինձ, ես կես դար ապրում եմ Հայայստանում, և գիտեք, որ փախչող մարդ չեմ»: Գալով ճնշումներին՝ Վարդան Պետրոսյանը նշեց, որ «ճնշում» բառը ճիշտ չի կիրառվում, «պետք է լինի քայլ՝ Հակոբյանների հետ հաշտության գնալու համար»:

«Ինչ վերաբերում է նրան, որ ես՝ ամբաստանյալս, խանգարել եմ և խանգարում եմ դատաքննությանը, ապա թույլ տվեք չհամաձայնել. ես եղել եմ կոմայի մեջ, իսկ դրանից հետո անմիջապես ձերբակալվել եմ և կալանավորվել»:

«Դատարանն ինձ կալանավորել է` մշտապես փակելով իմ առջև այն ճանապարհը, որով ես կարող էի հաշտության եզրեր գտնել»,- ասաց Վարդան Պետրոսյանը:

Կողմերին լսելուց հետո դատարանը գնաց խորհրդակցական սենյակ` կալանքը փոխելու միջնորդության վերաբերյալ որոշում կայացնելու համար:

«Փաստինֆո»