Տավուշի մարզի սահմանամերձ գյուղեր ուխտագնացության շրջանակներում, որը կազմակերպել էր Մայր Աթոռ Սուրբ Էջմիածինը` Վեհափառ Հայրապետի օրհնությամբ, լրագրողների և ուխտավորների մոտ 140 հոգանոց խումբը եղավ նաև hյուսիս-արևելյան սահմանագծի ուղղությամբ տեղակայված զորամասերից մեկում:

Զորամասի հրամանատար, փոխգնդապետ Սամվել Մինասյանի խոսքով, նման ուխտագնացությունները մեծ նշանակություն ունեն և ոգեշնչում են զինծառայողներին:

Սամվել Մինասյանն ընդգծեց, որ հաճախ են հրադադարի ռեժիմի խախտումներ լինում, որոնց դիմակայել կարող է միայն  կարգապահ զինծառայողը, իսկ մեր զինծառայողները, հրամանատարի հավաստամամբ, կարգապահ են ու թե՛ ֆիզիկակապես, թե՛ հոգեպես ամուր:

Մեծ նշանակություն ունի նաև զորամասի կենտրոնում գտնվող եկեղեցին, որը նպաստում է զինծառայողների բարձր բարոյահոգեբանական մթնոլորտի ապահովմանը, ինչպես նաև մարտական խնդիրների ավելի ճիշտ կատարմանը:

Զորամասի առօրեան հիմնականում հագեցած է մարտական պատրաստության պարապունքներով: Հատկապես հագեցած են կիրակնօրյա և տոնական միջոցառումները, իսկ հանրակրթական դպրոցի բարձր դասարանների սաների հետ համատեղ՝ հաճախ անցկացվում են սպորտ-մասայական միջոցառումներ:

«Այժմ անցկացվում են նաև շուրջօրյա պարապունքներ, որի ընթացքում զինծառայողները, ստորաբաժանումները գիշեր-ցերեկ նույն թեմաներով պարապոււնքներ են անցկացնում: Տեղում տեղաբաշխվելիս՝ խփվում են զինվորներին հատկացված երկտեղանոց վրանները, կազմակերպվում է պահպանություն»,-ասաց հրամանատար Սամվել Մինասյանը:

***

Շարքային Նարեկ Գրիգորյանը, որը 3,5 ամիս է, ինչ գտնվում է ծառայության մեջ, հավաստիացնում է, որ սկզբնական շրջանում դժվար է եղել,  այնուհետև զինծառայողների օգնությամբ կարողացել է հեշտությամբ հարմարվել ծառայությանը:  «Շուտով նաև բարձրանալու ենք մարտական հենակետ, առաջին անգամ եմ բարձրանում և շատ ոգևորված եմ»:

Մի փոքր պատմելով առօրեայի մասին՝ Նարեկն ասաց, որ կիրակի օրերին սպորտ-մասայական միջոցառումներ են կազմակերպվում, ակումբ ունեն, որտեղ զբաղվում են ընթերցանությամբ, ինչպես նաև՝  ֆիլմեր են դիտում:

Նարեկը, որը սովորում է Հայկական պետական կառավարման ակադեմիայի մագիստրատուրայի առաջին կուրսում, կիսատ է թողել ուսումը, տարկետում վերցրել և եկել  ծառայության:

Թեև ինքը ևս նորակոչիկ է, սակայն կոչ արեց բոլոր նրանց, ովքեր պատրաստվում են գնալ բանակ, վստահ լինել և չփախչել իրենց պարտավորություններից.

«Բոլոր նորակոչիկների մաղթում եմ, որ նրանք վստահ գան, ծառայեն: Բանակից պետք չէ խուսափել, դա ամրագրված է ՀՀ սահմանադրությամբ, որ յուրաքանչյուր ոք պետք է ծառայի իր հայրենիքին »,-նկատեց Նարեկը:

Վերջինս, ինչպես շատերը, մինչև զորակոչվելը, այլ պատկերացումներ է ունեցել բանակի մասին, սակայն ծառայության ընթացքում հասկացել է, որ խոսակցությունները չափազանցված են, իրական պատկերն, ըստ նրա, այլ է.

«Ծառայությունն էտքան էլ դժվար բան չի, ուղղակին պետք է ի սրտե նվիրված լինես քո հայրենիքին, և ծառայես ոչ թե հրամանատարին, կամ մեկ ուրիշին, այլ ծառայես քո խղճի, քո հայրենիքի համար »,-գտնում է նա:

«Իմ հարազատներին մաղթում եմ համբերություն, թող վստահ լինեն՝  իրենց տղան գտնվում է ապահով ձեռքերում, իր կողքին կանգնած են լավ հրամանատարներ »,-վերջում ավելացրեց Նարեկը:

Սերժանտ Արման Միքայելյանի կարծիքով էլ, վատ զինվոր չի լինում, պարզապես պետք է կարողանալ զինվորների հետ լեզու գտնել:

Արմանը պատմեց, որ շատ դժվար է, երբ նորակոչիկ ես լինում ու հարցնում ես ծառայակցիդ, թե  քանի օր է իրեն մնացել, ու պատասխան ես ստանում ՝ 2-3 օր, Արմանն անցել է այդ ամենի միջով ու հասկանում է, թե դա ինչքան դժվար է բանակ նոր-նոր զորակոչված զինծառայողի համար. հիմա նրան մնացել է ծառայելու մոտ 25 օր:

«Նորակոչիկներին մաղթում եմ այդ ամենը հեշտ հաղթահարեն, և իրենք էլ մեզ նման անփորձանք ծառայեն ու հասնեն իրենց հարազատներին»,-ասաց Արմանը:

***

Մաղթում ենք անփորձանք ծառայություն, բարի վերադարձ

Աստված թող պահապան լինի հայոց բանակի բոլոր զինծառայողներին

Հրամանատար Սամվել Մինասյան

—

Շարքային Նարեկ Գրիգորյան

—-

Սերժանտ Արման Միքայելյան

—

Աննա Սարգսյան