Ապրիլի 30-ին Ազգային ժողովում պատգամավորներ Վարդան Այվազյանի, Միքայել Մելքումյանի, Հովհաննես Սոֆոյանի և Արմեն Մխիթարյանի հեղինակած «Ակցիզային հարկի մասին» ՀՀ օրենքում փոփոխություն կատարելու մասին օրենքի նախագծի քվեարկությունն անցավ 1-ին ընթերցմամբ, թեև ԱԺ «ՀՅԴ», «Հայ ազգային կոնգրես», «Օրինաց երկիր», «Ժառանգություն» և «Բարգավաճ Հայաստան» խմբակցությունները չմասնակցեցին քվեարկությանը:

Նշենք, որ օրենքը նախատեսում է թանկարժեք մեքենաների վրայից հանել «շքեղության»՝ ակցիզային հարկը:

«Մեր կուսակցությունը չմասնակցեց. սա համարում եմ քաղաքական որոշում։ Ես կարգապահ կուսակցական եմ, եթե կուսակցությունը որոշում է ընդունել, չեմ կարող հաշվի չնստել», — ասաց օրենքի համահեղինակ, ԱԺ ԲՀԿ խմբակցության պատգամավոր Միքայել Մելքումյանը։

Նա նշեց, որ օրենքի հիմնական նպատակն է լուծում տալ մի քանի խնդիրների. առաջինը՝ բյուջեի հարկային մուտքերի ավելացման հետ կապված։

«Անցած 2 տարիների ընթացքում ակցիզային հարկի գործողության ժամկետում հազարից ավել մեքենաներ չեն ներկրվել, և մոտավորապես երեք միլիարդից ավել բյուջեն մուտք չի ունեցել։ Խնդիրներից մեկը սա է, բայց ոչ առանցքայինը։ Երկրորդն այն է, որ մենք թանկարժեք մեքենաների սեգմենտը չարգելակենք, և այդտեղ ներառենք գույքահարկի ռեժիմը։ Սա ես համարում եմ մասնագիտական մոտեցում»,- մանրամասնեց նա։

Անդրադառնալով «Կուտակային կենսաթոշակների մասին» օրենքում լրացումներ կատարելու մասին օրենքի նախագծին, Միքայել Մելքումյանը նշեց. «Կառավարությունը ժամանակ է խնդրում որոշակի քայլերով հասնելու այդ նպատակին, թե ինչ գործիքներով, տեմպերով ու մեխանիզմներով, կյանքը ցույց կտա։ Ստեղծվել է աշխատանքային խումբ, որտեղ ներառված են բոլոր խմբակցություններից ներկայացուցիչներ, որպեսզի այնպիսի լուծում տան, որ բոլոր կողմերին բավարարի»։