Այսօր ՎԱՐԿԱԾ ակումբում, լրագրողների հետ հանդիպման ժամանակ Համո Սահյանի ծննդյան 100-ամյակի կապակցությամբ, խոսեց բանաստեղծի որդին՝ Նաիրի Սահյանը: Նա նշեց, որ արդեն 2.5 տարի է՝ պետության կողմից չի ստանում աջակցություն ՝ Երևանում մեծանուն գրողի հուշարձանը կանգնեցնելու համար:

«ԱՄՆ-ից եկել եմ այդ հարցով, պետական որ դուռը բախել եմ, փակ է եղել իմ առաջ, ում հետ ուզեցել եմ զրուցել՝ նախարարներ, փոխնախարարներ, որոնք հնարավոր է և չգիտեն Սահյանին, նրանց կողմից չեմ հանդիպել աջակցության: Այս վերջերս միայն՝ մեկ շաբաթ առաջ, հեռագիր տվեցինք ՀՀ նախագահին: Երեք օր հետո, բյուրոկրատական ժանգոտ ապարատը սկսեց աշխատել՝ հրահանգը եղավ: Ես իհարկե, շատ շնորհակալ եմ նախագահին, բայց պետք է կարգադրենք, վախեցնենք, նո՞ր սկսեն տեղներից շարժվել»,-մտահոգված նշեց Նաիրի Սահյանը:

Նրա խոսքով, չնայած տարին ասվում է, թե սահյանական է, սակայն կառավարության կողմից պաշտոնապես այն չի ճանաչվել:

«Ես համոզված  չեմ, որ արվելու է այն, ինչ  խոսք են տվել: Եթե սիրում են պոետին, այսպիսի հանդիպումներ, երեկույթներ միշտ լինելու են, սակայն հուշարձան՝ չգիտեմ կկանգնեցվի, թե ոչ »,-ընդգծեց բանաստեղծի որդին և հավելեց, որ հույս չի կապում նաև նոր կառավարության հետ:

Ըստ նրա, նոր վարչապետը միգուցե վաղն ասի, թե իրեն չեն հրահանգել:

Ասուլիսի մյուս բանախոս «Համո Սահյան» գիտամշակութային կենտրոնի նախագահ Շչորս Դավթյանը հայտնեց, որ իրենց կենտրոնը երեք ուղղությամբ է զբաղվում՝ Համո Սահյանի ստեղծագործությունների տպագրությամբ, նրա ստեղծագործությունների գիտական արժևորմամբ  և նրա հիշատակի հավերժացման հարցերով:

Շչորս Դավթյանի տեղեկացմամբ, բանաստեղծի 100-ամյակիկապակցությամբ՝ տպագրվել է քառահատորի երկրորդ հատորը, նաև «Ինձ բացակա չդնեք» ժողովածուի 5-րդ հրատարակությունը, իսկ ժողովածուի երրորդ հատորը, ինչպես նաև հայրենները կտպագրվեն երկու շաբաթից:

«Կառավարությունը մինչև սեպտեմբեր հանձնարարել է թանգարան հիմնել՝ Լոր գյուղում, նաև կիսանդրիներ պետք է դրվեն բանաստեղծի գերեզմանին և Լոր գյուղում:  Կառավարական հանձնաժողովը խոստացել է նաև Երևանում կանգնեցնել բանաստեղծի հուշարձանը» ,-նշեց Շչորս Դավթյանը: