ՀՀ առողջապահության նախկին նախարար Հարություն Քուշկյանը ԼՂՀ նախագահ Բակո Սահակյանի հրամանգրով նշանակվել է ԼՂՀ առողջապահության նախարար:

Հարություն Քուշկյանը ծնվել է 1956 թվականի ապրիլի 14-ին` ծառայողի ընտանիքում: 
  1980 թվականին ավարտել է Երևանի Պետական Բժշկական ինստիտուտի բուժական ֆակուլտետը:

1980-1981 թվականներին աշխատել է Շտապ Օգնության թիվ 2 հիվանդանոցում:

1981-1984 թվականներին որպես շտապ օգնության բժիշկ աշխատել է Աշտարակի կենտրոնական շրջանային հիվանդանոցում:

1984-ից 1985 թվականը եղել է  Երևանի շտապ օգնության թիվ 2 հիվանդանոցի կրծքային վիրաբուժության բաժանմունքի օրդինատոր: 1985 թվականին էնդոկրին վիրաբուժության գծով  վերապատրաստվել է էնդոկրինոլոգիայի և հորմոնների ինստիտուտում: 1986 թվականին «Էրեբունի»  բժշկական կենտրոնում հիմնադրել է էնդոկրին վիրաբուժության բաժանմունքը` ստանձնելով բաժանմունքի վարիչի պարտականությունները: 1988 թվականին պաշտպանել է թեկնածուական ատենախոսություն` «Դիֆուզ տոքսիկ խպիպի վիրաբուժական բուժումը իմունամոդուլյատորների կիրառմամբ» թեմայով:  1990 թվականին վերապատրաստվել է  Կալիֆոռնիայի USC բժշկական կենտրոնում:

1990-1992 թվականներին որպես գլխավոր բժիշկ  աշխատել է «Էրեբունի» կլինիկական հիվանդանոցում: 1992-2007 թվականներին աշխատել է «Էրեբունի» բժշկական կենտրոնում` որպես հիմնադիր և գլխավոր տնօրեն:
   1993 թվականին պաշտպանել է դոկտորական ատենախոսություն` «Սրտի ֆունկցիայի և իմունային համակարգի կորեկցիան վահանաձև գեղձի որոշ հիվանդությունների ժամանակ» թեմայով: 1993 թվականին վերապատրաստվել է Հարվարդի բժշկական համալսարանում, Բոստոնի Բեթ Իսրայել հիվանդանոցում:

1993 թ. Երևանի պետական բժշկական համալսարանի թիվ 1 վիրաբուժության ամբիոնի պրոֆեսոր է: 1995-1996թթ եղել է ՀՀ ռազմաբժշկական վարչության պետ: 1995-1999թթ ընտրվել է  ՀՀ Ազգային ժողովի պատգամավոր:

1999թ վերապատրաստվել է Կալիֆոռնիայի համալսարանի Լոս Անջելեսի բժշկական կենտրոնում /UCLA/: 2000թ-ից «Медицинский вестник Эребуни» գիտաբժշկական հանդեսի հրատարակչական կոլեգիայի նախագահն է: 

2002-2007 թվականներին եղել է «Նաիրի» բժշկական կենտրոնի հիմնադիրը և գլխավոր տնօրենը: 2003թ-ին  Երևանի պետական բժշկական համալսարանի գիտխորհուրդը Հարություն Քուշկյանին  շնորհել է պրոֆեսորի գիտական կոչում:

2003 թվականից Առողջապահության ազգային ինստիտուտի էնդոկրին վիրաբուժության ամբիոնի վարիչն է: 2004թ պարգևատրվել է Ֆրիտյոֆ Նանսենի անվան շքանշանով: 2005թ պարգևատրվել է Երևանի պետական բժշկական ինստիտուտի Մ. Հերացու շքանշանով: 2005թ. ՀՀ Ազգային ժողովի կողմից պարգևատրվել է` ազգաբնակչության առողջապահության կազմակերպման գործունեության համար:

2005թ-ից ՀՀ օլիմպիական կոմիտեի բժշկական հանձնաժողովի նախագահն է: 2006թ. Հարություն Քուշկյանը  ՀՀ նախագահ Ռոբերտ Քոչարյանի կողմից պարգևատրվել է Մ. Հերացու անվան պետական մեդալով:

2007 -2012 թթ. եղել է ՀՀ առողջապահության նախարար: