ՌԴ Դոնի Ռոստով քաղաքում կայացել է Ուկրաինայի արդեն նախկին նախագահ Վիկտոր Յանուկովիչի մամուլի ասուլիսը, որին ներկա էր մոտ 200 լրագրող:

Յանուկովիչը նշել է, որ Ուկրաինան ուժեղ երկիր է կկարողանա հաղթահարել ճգնաժամը, որի առաջացման համար, ըստ նրա, մեղավոր է Արևմուտքի վարած քաղաքականությանը:

«Ես ստիպված էի լքել Ուկրաինան՝ իմ և իմ մերձավորների կյանքին սպառնացող վտանգի պատճառով: Սակայն ես մտադիր եմ շարունակել պայքարը՝ հանուն Ուկրաինայի ապագայի»,- հայտարարել է Վիկտոր Յանուկովիչը:

Նա ներողություն է խնդրել վետերաններից, ուկրաինացի ժողովրդից, ինչպես նաև արդեն լուծարված «Բերկուտ» հատուկ ջոկատի մարտիկներից՝ Ուկրաինայում տեղի ունեցածի համար, նաև այն բանի համար, որ իր ուժերը չբավականացրեցին կայունություն պահպանելու համար:

Յանուկովիչը տեղեկացրել է, որ Ռուսաստան հաստատվելուց հետո դեռ չի հանդիպել ՌԴ նախագահ Վլադիմիր Պուտինի հետ, միայն հեռախոսազրույց է ունեցել, իսկ թե երբ կկայանա նրանց հանդիպումը, Յանուկովիչը դեռ չգիտի:

Նա պատմել է, որ Կիևից Խարկով մեկնելու ճանապարհին նրա ավտոմեքենայի վրա կրակել են, ինքը եղել է մի քանի շրջաններում, նաև՝ Ղրիմում, և տեղաշարժվել է ավտոմեքենաներով և ուղղաթիռներով։

Ըստ Յանուկովիչի, Ռուսաստանը պետք է և պարտավոր է գործել։

«Իմանալով Պուտինի բնավորությունը՝  զարմանում եմ, թե ինչու է այսքան ժամանակ նա լռում»,-նշել է նա։

Վիկտոր Յանուկովիչը մայիսի 25-ին նախատեսված նախագահական արտահերթ ընտրությունների անցկացումն անօրինական է համարում, և չի մասնակցի դրանց։

Ուկրաինայի արդեն նախկին նախագահը,ասուլիսի եզրափակիչ խոսքում, դիմելով երկրի ներկայիս իշխանություններին, կոչ է արել վերջ տալ անօրինականություններին։