ՀՀ նախագահի նախկին թեկնածու, քաղաքագետ Անդրաս Ղուկասյանը ֆեյսբուքի իր էջում գրել է.

«Ըստ Սահմանադրության, Հայաստանում կուսակցությունները պարտավոր են նպաստել ժողովրդի քաղաքական կամքի ձևավորմանն ու արտահայտմանը: Եկել է այն պահը, երբ նրանց դիրքորոշումից է կախված գազի և էլեկտրաէներգիայի սակագների վերանայման պահանջների բաց և թափանցիկ դատաքննության իրականացումը:

ՀՀ վարչական դատարանը անտեսեց 15 հազարից ավելի քաղաքացիների գրավոր դիմումները՝ այդ գործերը քննել դռնբաց դատարանում: Անցյալ տարի օգոստոսից սկսած՝ 4 ամիս ինքն իր հետ այս հանրային նշանակություն ունեցող հարցերը քննելու արդյունքում, 2013թ. դեկտեմբերի 17-ին վարչական դատարանը բնականաբար կայացրեց ակնհայտ անօրինական որոշումներ: Վերաքննիչ վարչական դատարանը որոշել է կրկնել առաջին ատյանի դատարանի ճանապարհը և 2014թ. փետրվարի 17-ից այդ գործերը ընդունել է վարույթ՝ դարձյալ գրավոր ընթացակարգով:

Թեպետ այս ընթացքում Հայաստանում բոլորը այս կամ այն կերպով իրենց կարծիքները սակագների բարձրացման վերաբերյալ արտահայտեցին, սակայն վարչական դատարանի դատավորները շարունակում են համառորեն պնդել , որ գազի և էլեկտրաէներգիայի սակագների բարձրացման անօրինականության հարցը չունի հանրային հնչեղություն:

Ակնհայտ է, որ այդ գործերի դռնբաց քննությունը ամենակարճ ճանապարհն է պատասխան ստանալ այն հարցերին, թե որտեղից ձևավորվեց «ՀայՌուսգազարդ» ՓԲԸ (արդեն «Գազպրոմ Արմենիայի») 300 մլն. դոլարի պարտքը Հայաստան ներմուծվող գազի դիմաց և մնացած բոլոր հարցերը «թե ինչպես եղավ, որ այդպես եղավ» շարքից:

Նման իրողության մեջ Հայաստանի կուսակցությունների պաշտոնական դիրքորոշումը գազի և էլեկտրաէներգիայի սակագների վերանայման դատական գործերը դռնբաց դատարանում քննելու վերաբերյալ կարող են վերջակետ հանդիսանալ արհեստական բանավեճում՝ անկախ և արդա՞ր է Հայաստանում դատական համակարգը, թե՞ ոչ: Այսօր, երբ քամիները թե հյուսիսից, թե արևմուտքից Հայաստան են բերում հեղափոխության ոգին, հարցը դրված է այսպես. կամ կուսակցությունները կարձանագրեն իրենց սնանկությունը, կամ՝ կփորձեն բացահայտել դատական իշխանության սնանկությունը»: