Մարդ էակին բարձրացումը մինչեւ Արարչութեան ոլորտները կրնայ իրագործուիլ միայն խոնարհութեամբ, սեփական մեղքերու խոստովանութեամբ, զղջումով….Մեր Մեծամեծներէն՝ ԳՐԻԳՈՐ ՆԱՐԵԿԱՑԻ այս պատգամը տուաւ մեզի՝ դար ու դարեր առաջ, երկնելով իր մեծ մատեանը՝ Նարեկը, որպէս նաեւ իր յետնորդներուն ՈՒՂԵՑՈՅՑ ՄԱՏԵԱՆ….Բայց որքա՛ն հեռացեր ենք մենք ի Հայաստան եւ ի Սփիւռս հոգեւոր-բարոյական այդ վարքագիծէն, որդեգրելով գոռոզամտութեան, յոխորտանքի, եսամոլութեան….վարքագիծը: ՎԵՐԱԴԱՐՁ դէպի բարոյական մաքրութեան ՆԱՐԵԿԵԱՆ ուղեգիծը կրնայ «ժամանակավրէպ» եւ նոյնիսկ տարօրինակ հնչել, բայց ԲԱՆԱԼԻՆ է ազգային իրա՛ւ յառաջդիմութեան եւ զարգացման…

***

Կեանքի մէջ ամէն բան իր ԽՈՐՀՈՒՐԴՆ ունի….Կարելի չէ խորհրդազրկել, օրինակ, կնոջ մարմինը, զայն առեւտրական գովազդի վերածելով, զայն գռեհկացնելով….: Նոյնը կարելի է ըսել սիրոյ մասին, սիրոյ մտերմիկ պահերուն մասին, սեռային յարաբերութեանց մասին, որոնք ներկայիս ՀՐԱՊԱՐԱԿԱՅԻՆ ցուցադրման են դրուած եւ այնքա՛ն ԽՈՐՀՐԴԱԶՐԿՈՒԱԾ….: Սա ոչ թէ յառաջդիմութիւն է, այլ ԿԵԱՆՔԻ ԳՌԵՀԿԱՑՈՒՄ….Սրբութիւններ կան, որոնք իրենց ԳԵՂԵՑԿՈՒԹԵԱՆ ԽՈՐՀՈՒՐԴՆ ունին…: Ներկայիս, դիտումնաւոր կերպով, ծրագրուած կերպով՝ կը քաջալերուի մարդ էակի ԱՆԱՍՆԱՑՈՒՄԸ….Պիտի ճանչնանք մենք զմեզ եւ չիյնանք այդ ԹԱԿԱՐԴԻՆ մէջ:

Երան Գույումջյանի ֆեյսբուքյան էջից