«Հայկական Վարկած»-ի զրուցակիցն է Հայաստանի աճպարարների միության (ՀԱՄ) նախագահ, աճպարար Վարդան Ամիրյանը.

— ՀԱՄ—ն այսօր ի՞նչ գործունեություն է ծավալում.

— ՀԱՄ-ի գլխավոր նպատակն է՝ զարգացնել աճպարարությունը Հայաստանում՝ մեկ հարկի տակ հավաքելով այն տաղանդավոր և շնորհալի մարդկանց, ովքեր սիրում և զբաղվում են այս արվեստաձևով:

—Ի՞նչ հաջողություններ եք գրանցել այս ընթացքում.

-ՀԱՄ-ն ապրիլի մեկին կդառնա երկու տարեկան, և հաջողություններից ամենագլխավորն այն է, որ միության անդամներից Սուրեն Վարդանյանը մասնակցեց Ուկրաինայի «Թաքնված տաղանդ» նախագծին և արժանացավ բարձր գնահատականի, իսկ Հայկ Միքայելյանը հրավեր ստացավ մասնակցելու Բուլղարիայում աճպարարների միջազգային փառատոնին և նույնպես արժանացավ հանդիսատեսի ու ժյուրիի բարձր գնահատականին:

—Անդամների մասնագիտական ուսուցումն ու վերապատրաստումն ինչպե՞ս է կազմակերպվում։

— ՀԱՄ-ում կազմակերպվում են սեմինարներ տարբեր երկրերից ժամանած աճպարարների կողմից, ինչպես նաև՝ անդամները կիսվում են իրենց գիտելիքներով ու փորձով, և այս ամենը օգնում է, որպեսզի հարստացնեն իրենց գիտելիքներն աճպարարության վերաբերյալ:

—Ի՞նչ ծրագրեր կան առաջիկայում:

— Առաջիկայի նպատակներից և ծրագրերից մեկը Հայաստանում աճպարարների միջազգային փառատոն կազմակերպելն է:

— Որո՞նք են միության առջև դրված խնդիրները.

— Այսօր գլխավոր խնդիրն այն է, որ ՀԱՄ-ը չունի հիմնական հավաքատեղի, այսինք՝ մենք դեռ չունենք տանիք, որի ներքո կկարողանանք ավելի հաճախ հանդիպել, քննարկել հարցեր և ավելի արագ կատարելագործվել:

—Այս բնագավառն այսօր ի՞նչ զարգացում է ապրում աշխարհում, ի՞նչ նորություններ կան.

 -Աշխարհի բոլոր զարգացած երկրներում, որտեղ կազմակերպվում են շքեղ շոուներ, հիմնական շեշտը դրված է աճպարարաության վրա, որը մարդիկ շատ են սիրում: Զարգացնողներից մեկն էլ հանդիսանում է Սոս Պետրոսյանը, որն այսօր ապրում և ստեղծագործում է Գերմանիայում։ Նա իր գեղեցիկ և օրիգինալ զգեստափոխումով գրանցվել է գինեսի գրքում: Իսկ նորություններն ավելի մասնագիտական են, որի քննարկումը հետաքրքիր կլինի միայն աճպարարին, իսկ վայելումը՝ հանդիսատեսին:

— Ինչո՞ւ Հայաստանում կանայք հակված չեն աճպարարությամբ զբաղվել:

— Այդքան կենցաղային խնդիրները, որ մեր կանայք հրաշքով լուծում են և կարողանում են մնալ գեղեցիկ և հմայիչ, դա արդեն մեծ աճպարարություն է:

—Աճպարարական նոր հնարքներն ինչպե՞ս են ստեղծվում. հեղինակային իրավունքը կիրառվո՞ւմ է։

-Աճպարարական հնարքները ստեղծվում են աճպարարական գիտելիքների հիման վրա, ինչպես նաև դրան գումարվում է վառ երևակայությունը, որը բնորոշ է աճպարարին, և այս բոլորը մի փոքր համեմում ենք մուսայով։ Իմ դեպքում իմ մուսան հանդիսանում է իմ կինը, որը նաև իմ գործընկերն է բեմում:

Ինչպես բոլոր արվեստաձևերում, այնպես էլ աճպարարության մեջ պահպանվում են ստեղծագործության հեղինակային իրավունքները:

—Բարեգործական ծրագրեր կազմակերպո՞ւմ եք.

— Բարեգործական միջոցառումներով հանդես ենք գալիս Հայաստանի բոլոր մանկատներում:

— Զվարճալի դեպք, որ եղել է ձեր գործունեության ընթացքում:

— Մեկ անգամ, արտասահմանյան հյուրախաղերի ժամանակ, շուկայում ձուն կոտրեցի և միջից ոսկե մատանի դուրս բերեցի, նույնը կրկնեցի երկրորդ, երրորդ ձվի հետ և հեռվից աննկատ հետևեցի վաճառողուհուն, թե ինչպիսի ոգևորվածությամբ էր կոտրում վաճառքի դրված ձվերը’ ակնկալելով ոսկե մատանիներ …

Մարինե Ամիրյան