Էրիկ Կարապետյանի համար կրկին ստեղծագործական բուռն ժամանակաշրջան է. տարվա լավագույն երգիչը նույն աշխատասիրությամբ շարունակում է հանդես գալ ինչպես համերգային շրջագայություններով, այնպես էլ նոր երգերով ու տեսահոլովակներով:

Նա՝ «Հայկական Վարկած»-ի թղթակցի հետ զրույցում, պատմեց, թե այժմ ինչով է զբաղված:

Երգչի տեղեկացմամբ, փետրվարի 24-ին մեկնելու է ԱՄՆ, քանի որ մարտի 9-ին Լոս Անջելեսի «PASADENA CIVIC» դահլիճում համերգ է տեղի ունենալու նրա, Ինգա և Անուշ Արշակյանների ու Արսեն Սաֆարյանի մասնակցությամբ:

«Այս պահին զբաղված եմ այդ համերգի նախապատրաստական աշխատանքներով։ Բացի այդ՝ շուտով կտեսնեք երկու տեսահոլովակ. առաջինի պրեմիերիան օրերս կլինի, իսկ երկրորդը նախատեսված է մարտի 8-ին»,-տեղեկացրեց նա։

Առաջին տեսահոլովակը, որը նկարահանված է Միացյալ Նահանգներում, Էրիկի և ռեփեր Նովվայի համատեղ զուգերգն է:

«Անգլերեն երգ է, որը հայերեն թարգմանաբար կոչվում է «Ես կանեմ ամեն ինչ»։ Ես երգում եմ, իսկ Նովվան ռեփ է կարդում, առաջարկը նրա կողմից է եղել։ Մինչ այդ՝ միայն մեկ անգամ եմ նման համագործակցություն ունեցել, որն Անդրեի հետ դուետն էր, դրանից հետո չի եղել, որ որևէ մեկի հետ տեսահոլովակ նկարահանվի։ Չգիտեմ, թե սա որքանով կարելի է զուգերգ համարել, համարենք՝ համագործակցություն»,-նշեց Էրիկը։

Կանանց միամսյակին նվիրված՝ կներկայացվի Էրիկի երկրորդ տեսահոլովակը, որը նկարահանվել է դեկտեմբերի 29-ին և 30-ին. «Բոլորը բուդ էին պատրաստում, իսկ ես՝ տեսահոլովակ», — կատակում է նա, -«Չեմ ուզում բացել չակերտները, շուտով կտեսնեք։ Եթե առաջին երգը լինելու է ռիթմիկ, անգլերեն լեզվով, ապա այս մեկը հայերեն է, մելոդիկ, սիրո մասին»։

Մարինե Ամիրյան