ԽԱՌՆԻՃԱՂԱՆՃ….Մեր դարուն յատուկ իրավիճակ է կարծէք սա: Լրատուամիջոցները, գովազդը, ազատութեան եւ մարդկային իրաւանց անունով խօսող տեսակ-տեսակ կազմակերպութիւնները՝ խօսքը մէկ ըրած, կը ստեղծեն արժէքներու, եզրոյթներու, կարծիքներու այնպիսի խառնաշփոթ մը, որպէսզի մարդ էակին գիտակցութիւնը մնայ քաոսային վիճակի մը մէջ, չկարենայ տարանջատել ճշմարիտը՝ սուտէն ու կեղծիքէն, ճիշդը՝ սխալէն, չկարենայ խորանալ ներկայացուած խնդիրներու բուն էութեան մէջ….:
Այն տպաւորութիւնը կը ստեղծուի, որ մարդկային գիտակցութիւնը՝ կարծէք դիտաւորեալ կերպով, կը կառավարուի անտեսանելի ոյժերու կողմէ, կը դառնայ ձեռնավարելի, ըստ անոնց կամայականութիւններուն, էապէս կորսնցնելով իր ազատութիւնն ու անկախութիւնը…:
Իրերու այս վիճակը հակակշռելու համար, անչափ կարեւոր է որ մեր կրթական համակարգը խթանէ՝ ազատ եւ անկախ մտածելու կարողութիւնը, ինքնուրոյն դատելու, հարցերը քննարկելու, վերլուծելու վարժութիւնը….ԳԻՏԱԿՑՈՒԹԵԱՆ ԱԶԱՏԱԳՐՈՒՄԸ ԴԱՐՁԵՐ Է ՀՐԱՏԱՊ ԽՆԴԻՐ ստեղծուած այս ԽԱՌՆԻՃԱՂԱՆՃԻՆ մէջ….

***

Եթէ մենք կարենանք նոր շունչ ու կեանք տալ մեր երկրի հոգեւոր-բարոյական արժէքներուն, նիւթն ու նիւթականը չդարձնել մեր անհատական թէ հաւաքական կեանքի սեւեռակէտը, յայնժամ կրնանք ազգային վերածնունդի յոյսը փայփայել, նոր վերադարձ կատարել դէպի իրա՛ւ հայկականութիւն….կառուցել հայկական պետականութիւն, որուն հիմքերը խարսխուած ըլլան հայ արժէքային համակարգի վրայ, եւ ոչ՝ օտարէն ներմուծուած, հայ հոգիին էապէս խորթ հակամշակոյթի տարրերուն վրայ, որոնք կը միտին մոլորեցնել մեզ՝ որպէս հայոց ազգ ու հայոց երկիր….

Երան Գույումջյանի ֆեյսբուքյան էջից