Ամբողջական ծավալով այսօր շահագործման հանձնված Հրազդանի ՋԷԿ–ի 5-րդ էներգաբլոկի տարածքում շրջայցից հետո «Գազպրոմ» ԲԲԸ վարչության նախագահ Ալեքսեյ Միլլերը շնորհավորել է կայանի և «ՀայՌուսգազարդ» ընկերության աշխատակիցներին էներգաբլոկի լիարժեք շահագործման կապակցությամբ, ինչպես նաև տեղեկացրել, որ այսօր կստորագրվի պայմանագիր, որով «Գազպրոմ» ԲԲԸ–ին կանցնի «ՀայՌուսգազարդ» ՓԲԸ–ի՝ ՀՀ կառավարությանը պատկանող 20% մասնաբաժինը:

Ինչպես  տեղեկացնում է «ՀայՌուսգազարդ» ՓԲԸ–ի մամուլի ծառայությունը, իր խոսքում «Գազպրոմ» ԲԲԸ Վարչության նախագահը, մասնավորապես, նշել է. «Այսօր իսկապես պատմական օր է, քանի որ ստորագրվելու է համապատասխան փաստաթուղթ, համաձայն որի «Գազպրոմ»-ը ձեռք է բերում «ՀայՌուսգազարդ»-ի բաժնետոմսերի 20 տոկոսը և դառնում է ընկերության լիակատար բաժնետեր: Այսպիսով, «ՀայՌուսգազարդ»-ը ներգրավվում է «Գազպրոմ»-ի դուստր ձեռնարկությունների համերաշխ ընտանիքում:

Այսօր նաև ստորագրվելու է Հայաստանի համար շատ կարևոր պայմանագիր գազի մատակարարման վերաբերյալ: Սահմանվելու է նոր գին, և Հայաստան մատակարարվող գազի այդ գինը փոխկապակցած է լինելու Ռուսաստանում գործող ներքին գների հետ: Անկասկած, սա չափազանց հզոր ազդակ է Հայաստանի սոցիալ-տնտեսական զարգացման համար:

«Գազպրոմ»-ը թիվ մեկ և իր ոլորտում առաջատար ընկերություններից մեկն է, բայց միաժամանակ նաև սոցիալական պատասխանատվությամբ ընկերություն է: «ՀայՌուսգազարդ»-ը՝ միանալով դուստր ձեռնարկությունների համերաշխ ընտանիքին, դառնում է լիիրավ ընկերություն իր պարտավորություններով, բայց նաև իր իրավունքներով: Մեզ համար շատ կարևոր այս դուստր ընկերության համար ևս կգործեն բոլոր այն սոցիալական կանոնակարգերը, որոնք առկա են «Գազպրոմ»- ում: Մասնավորապես, դա վերաբերում է նաև աշխատավարձերին»,– ասել է նա:

Իր հերթին, «ՀայՌուսգազարդ» ՓԲԸ վարչության նախագահ, գլխավոր տնօրեն Վարդան Հարությունյանը շնորհավորելով ներկաներին՝ կարևորել է Հրազդանի ՋԷԿ–ի 5-րդ էներգաբլոկի արդիականացման ծրագրի և կայանի փորձարարական-արդյունաբերական շահագործման փուլի ավարտը:

«Ցանկանում եմ հատկանշել «Գազպրոմ» ԲԲԸ ղեկավարության և անձամբ Ալեքսեյ Միլլերի աջակցությունն այս հարցում, ով վստահեց և ընդառաջեց մեզ, որպեսզի մեր ծրագրերը կյանքի կոչվեն»,– ընդգծել է Վ.Հարությունյանը:

«ՀայՌուսգազարդ» ՓԲԸ վարչության նախագահ, գլխավոր տնօրենը շնորհակալություն է հայտնել նաև բոլոր այն մարդկանց, որոնց ջանքերի և նվիրված աշխատանքի շնորհիվ, ըստ նրա, կյանքի է կոչվել լայնածավալ և համարձակ մի նախագիծ, որի արդյունքների ականատեսն ենք այսօր: