Այսօր ՎԱՐԿԱԾ ակումբում թատերագետ-հրապարակախոս Լևոն Մութաֆյանն, անդրադառնալով  իր և Հակոբ աբեղա Գրիգորյանի շուրջ ստեղծված աղմուկին, նշեց թե այս ամենը սկսվել է, երբ   Հայր Հակոբն իրեն մեղադրել է հայոց բանակի նկատմամբ թշնամանք հրահրելու մեջ:

Ի դեպ, այսօր ասուլիս է հրավիրել նաև Հայր Հակոբը և պարզաբանել.«Դա հատկապես նրանից հետո էր, որ ինքը իր հրապարակումներում անդրադարձավ բանակին: Եվ ես մի հոդվածով հանդես եկա, որտեղ ընդամենն ասացի, որ մեկը, ով բանակի դեմ այդպիսի թունավորվածությամբ է խոսում, կարելի է համեմատել այն մարդկանց հետ, ովքեր թուրքի ջրաղացին ջուր լցնող են: Դրանից հետո Մութաֆյանը սկսեց իմ դեմ հանդես գալ և ինձ մեղադրել մի բանի մեջ, որը եկեղացական համբավի մեջ համարվում է չարյաց գագաթ՝ առանց հիմնավոր փաստերի: Ինքը ուղղակի վրեժ է լուծում իմ հրապարակման պատճառով: Գուցե, ինքն էլ ինչ-որ մեկի կողմից է օգտագործվում»:

Հոգևորականն ասել է, որ հանդես է եկել իր աշխարիկ անունով՝ Արման Գրիգորյան:

Թատեագետը պնդում է, թե կայքերից մեկն իր դեմ 4-5 հոդված է տպագրել՝ ԱրմՀակ անունով, ըստ նրա, այդ մարդը նույն Հայր Հակոբն է. «Հետո, էս ԱրմՀակը ֆեյսբուքյան ընկերության առաջարկ արեց, ընդունեցի, հետո էլի մարդիկ տվեցին: Նրանցից մեկը՝ Արսեն Լևոնյան անունով, ներկայացավ որպես լրագրող Կալինիգրադից և ինձ գրեց, թե  կարող է նյութեր տրամադրել կաթողիկոսի մասին: Շատերը կարծում են, թե ես եկեղեցու դեմ եմ գրում, այդպիսի բան չկա, ես եկեղեցու սպասավորների դեմ եմ գրում: Հենց կաթողիկոսի դեմ էլ եմ գրել: Լևոնյանը նշում էր նաև, թե իմ բարեկամ, Պոլսո պատրաիարք Մութաֆյանի դեմ մահափորձը նույնպես վեհափառն է կազմակերպել, սակայն ես չեմ ուզում հավատալ»:

Ինչ վերաբերվում է լուսանկարներին, Մութաֆյանն ասուլիսի մասնակիցներին  պատմեց, որ լուսանկարներն իրեն տրամադրել է կազմակերպության անդամներից մեկը՝ Սևակ անունով (հավանաբար խոսքը «Միացյալ երիտասարդական լիգա» կազմակերպության համանախագահ Սևակ Հովհաննիսյանի մասին է-խմբ.), սակայն առաջին անգամ , նրա հավաստմամբ, ֆոտոները  ինքը չի հրապարակել:

Հոգևորականն ասել է, թե հրապարակված լուսանկարները, որում պատկերված են ինքը և մի երիտասարդ, իր անձնական արխիվից անհետացել են, ինչ-որ մեկը գողացել է, և ինքը չգիտի, թե ով:
Աբեղան պատմել է, որ նկարներում պատկերված տղան իր մորաքրոջ տղան է: «Իմ մորաքույրները Հայաստանում են բնակվում, և այդ երիտասարդն իմ մորաքույրներից մեկի տղան է»:

Իսկ թե ինչո՞ւ է ինքը լուսանկարում կերակրում տղային, Հայր Հակոբը պարզաբանել է. «Որևէ մեկը ընտանեկան նեղ շրջանակում չի կարո՞ղ կերակրել: Դա նորմալ է»:
Իսկ Մութաֆյանը պնդում է. «Նկարի մեջի տղային ճանաչում եմ, նա շատ հայտնի համասեռամոլ Դավիթն է: Ես կոմայգու մոտ եմ ապրում, գիտեմ, և այդ մարդը բարոյական իրավունք ունի՞ ինձ կոչելու բանակի թշնամի, երբ վավաշոտ հայացքով գրկել է իր բարեկամին: Ես փաստեր ունեմ, հենց նրանից մեկն ինձ  Ֆեյսբուքով առաջարկություն է արել»,-ասաց Մութաֆյանը:

Ինչևէ, հոգևորականն ասել է, թե ինքն արդեն դիմել է կաթողիկոսին՝ խնդրելով դադարեցնել իր գործունեությունը, և միևնույն ժամանակ դիմելու է ոստիկանություն: