Միշել Մոնտեն

Ինչպես անմշակ հողը, եթե այն պարարտ է ու բերրի, ծածկվում է հազարատեսակ մոլաբույսերով ու անպետք խոտերով և մեր նպատակներին ծառայեցնելու համար անհրաժեշտ է սկզբից մշակել այն և որոշակի սերմեր ցանել, ինչպես կանայք ինքնուրույնաբար կարող են ստեղծել միայն տձև մարմնակույտեր ու գնդիկներ, իսկ որպեսզի առողջ ու ամրակազմ սերունդ տան, նրանց անհրաժեշտ է կողմնակի բեղմնավորում, այդպես է նաև մեր խելքը: Եթե այն չզբաղեցնենք որոշակի զսպող բանով, կսկսի դեսուդեն ընկնել երևակայության անծայրածիր դաշտերում. Ինչպես պզնձե ամանում ալիքվող ջուրը, անդրադարձնելով արևը կամ փայլող լուսընկան, արձակում է շողեր, որոնք ճախրում են դեսուդեն, թռչում վերև ու դիպչում բարձր առաստաղի զարդաքանդակներին:

Եվ ինչ անմտություն, ինչ զառացանք ասես, որ չի ծնի մեր բորբոքված միտքը,

Velut aegri somnia, vanae

Fingunter species (Հիվանդի երազների նման ստեղծվում են անիմաստ պատկերներ)

Կանխապես սահմանված նպատակ չունեցող հոգին իրեն դատապարտում է կործանման, քանզի, ինչպես ասվում է, ով ամեն տեղ է, նա ոչ մի տեղ չէ.

Quisquis ubique habitat, Maxime, nusquam habitat (Ով ապրում է ամեն տեղ, Մաքսիմ, նա չի ապրում ոչ մի տեղ):