Այսօր՝ նոյեմբերի 9-ին, Կոտայքի մարզի ընդհանուր իրավասության Աբովյանի դատարանում դռնփակ դատական նիստ է սկսվել:

Ինչպես հայտնում է shamshyan.com-ը, քիչ առաջ շտապօգնության մեքենայով դատարան է բերվել ճանաչված դերասան Վարդան Պետրոսյանը:

Այս պահին Վարդան Պետրոսյանը ոստիկանների ուղեկցությամբ մտել է դատարանի շենք և մինչ ներս մտնելը, բացառիկ հարցազրույց է տվել SHAMSHYAN.com-ին:

Ֆոտոլրագրող Գագիկ Շամշյանը հայտնել է, որ ճանաչված դերասանը հայտարարում է, թե իր նկատմամբ կատարվել են ապօրինի գործողություններ, քանի որ ինքը երբևիցե չի հրաժարվել ներկայանալ քննչական մարմնին և և հայտնել, որ ցավակցում է մահացածների ընտանիքներին, որ իր մեղքով տեղի ունեցավ այդ ողբերգությունը:

***

Ֆոտոլրագրողի փոխանցմամբ՝ արդեն սկսվել է դռնփակ դատական նիստը, որը նախագահում է նշված դատարանի դատավոր Արիս Միսակյանը, իսկ Վ. Պետրոսյանի փաստաբանն է Նիկոլայ Բաղդասարյանը: Դատարանի շենքում են գտնվում ոստիկանության Նաիրիի բաժնի աշխատակիցները՝ Նաիրիի ոստիկանապետ Սեյրան Մարտիրոսյանի գլխավորությամբ:

Դատարան են ժամանել նաև ոստիկանության քննչական գլխավոր վարչության Կոտայքի մարզի քննչական բաժնի պետ Վալենտին Պապյանը և նույն վարչության Կոտայքի քննչական բաժանմունքի պետ Կարեն Խաչատրյանը: Դատարանի շենքում ուժեղացված ծառայություն են կատարում նշված դատարանի դատական կարգադրիչները:

Մանրամասներն` այստեղ: