Ախալքալաք այցելած Վրաստանի նախագահ Միխեիլ Սաակաշվիլին նշել է, որ իրեն փորձում է դատել 3 մարդ՝ Պուտին-Մեդվեդև, Իվանիշվիլի և Վահագն Չախալյան, գրում է apnsy.ge-ն։

«9 տարի առաջ այստեղ նույնիսկ դրոշ չէր ծածանվում, իսկ հիմա նայեք, թե վրացական դպրոց ենք մենք ստեղծել: Վրացերեն լեզվի ուսուցիչներ ենք բերել, և երեխաներն այստեղ խոսում են վրացերեն, և որ ամենակարևորն է վրացական ինքնագիտակցություն ենք ձևավորել: Այստեղ մեծ երկաթգծային նախագիծ ենք գործարկել:

Իրոք, Ախալքալաքը վերադարձել է Վրաստանի իրավասությունների տակ, իսկ Թբիլիսիում դա ոչ ոք չի նկատում, իսկ ես էլ ախր գիտեմ, թե ինչ է կատարվել: Իսկ այսօր այս ավազակն է հայտնվել, այս Չախալյանը և նրա հռետորաբանությունը համապատասխանում է իշխանությունների հռետորաբանության հետ: Պարզվում է` ես քանդում էի այս երկիրը, երբ այստեղ երկաթուղի էի կառուցում:

Չախալյանն ասում է, որ պետք է դատել Սաակաշվիլուն։ Այո, Սաակաշվիլուն դատել է ուզում աշխարհում 3 մարդ` Պուտին-Մեդվեդևը, Իվանիշվիլին և Չախալյանը: Դա ձեզ ոչինչ չի՞ հուշում: Կոչ եմ անում Վրաստանի իշխանություններին ազատվել այս անջատողականներից: Վրաստանի անվտանգությունը չարժե զոհաբերել անձնական մաղձին, ատելությանը և օտար պետության պատվերներին: Սա իմ վերջին նախազգուշացումն է: Մի’ տարեք մեզ դեպի Շևարդնաձեի ժամանակաշրջանի քաոսը»,-հայտարարել է Սաակաշվիլին: