«Արթիկ» քրեակատարողական հիմնարկի դատապարտյալ Պարույր Ափինյանի հարազատներն այս պահին բողոքի ցույց են անում Արդարադատության նախարարության շենքի առջև:

Դատապարտյալի եղբայրը՝ Սահակ Ափինյանը զանգահարել էր «Հայկական Վարկած»-ին՝ դժգոհելով, որ արդեն 11 օր է՝ իր եղբոր կալանքի ժամկետը լրացել է, սակայն նրան չեն ազատում. խնդիրը պատժի ժամկետը հաշվարկելու մեջ է:

Դատապարտյալը պատիժը կրել է 10 տարի, և այժմ հարազատները գտնում են, որ նրա վրա պետք է տարածվի նախնական կալանքի՝ օրը օրուկես հաշվելու կարգը, որը գործում էր նախկինում. (տեղեկացնենք, որ կար սահմանված կարգ, ըստ որի՝ նախնական կալանքի տակ գտնվող անձաց  կալանավայրում գտնվելու 1 օրը հաշվվում էր օր ու կես):

ՔԿՀ մամուլի պատասխանատու Գոռ Ղլեչյանը պարզաբանեց, որ նախնական կալանքի 1 օրն օրուկես հաշվելու կարգը  տարածվում է մինչև 2004 թվականը դատապարտված անձանց վրա, իսկ  մյուս դատապարտյալների վրա չի տարածվում»:

Դատապարտյալի եղբայրն ասաց, որ իրենք դիմել են Արթիկի ընդհանուր իրավասության դատարան, սակայն այնտեղից  կոնկրետ պատասխան դեռ չեն ստացել. «Մենք ապրում ենք Երևանում. օրը մի թուղթ են ուզում՝ տանում –բերում են: Ամեն օր էդ պատճառով գնում — հասնում ենք Արթիկ»:

Սահակ Ափինյանն ասաց, որ քիչ առաջ իրենց է մոտեցել  նախարարի մամուլի խոսնակը, լսել բողոքները և նշել, որ ինքն ընդամենը փոխանցող է ու դժգոհությունները կհայտնի նախարարին:

Ակցիայի մասնակիցները մարտական են տրամադրված. նրանք ասում են, որ եթե իրենց  պահանջները չբավարարվեն, վաղը՝ ժամը 12.00-ին, ավելի մեծ խմբով ցույց կկազմակերպեն:

Ա. Սարգսյան