Ռուսաստանի Դաշնության անվտանգության խորհրդի քարտուղար Նիկոլայ Պատրուշևի այցը Հայաստան կատարվեց այն ժամանակ, երբ հայ ժողովուրդը ցնցված ու վիրավորված էր ստրատեգիական դաշնակից Ռուսաստանի իրականացրած հակահայ ռազմաստրատեգիական գործարքից:

Ճիշտ է, ՌԴ անվտանգության խորհրդի քարտուղարը լրագրողների հարցերին պատասխանեց որպես Ռուսաստանի քաղաքացի և ասաց, որ Ռուսաստանն այդ գործարքով չի խախտել ոչ մի միջազգային պայմանագիր ու պարտավորություն: Իսկ հարցը, որ Հայաստանի սահմանների մոտ կենտրոնացվել է ռուսական ահռելի ռազմական ուժ, շրջանցվեց:

Այդ ֆոնի վրա ՀՀ անվտանգության քարտուղար Արթուր Բաղդասարյանը հանգիստ, անխռով տեսքով փորձում էր համոզել բոլորին, որ ոչինչ չի կատարվել, և մեր հարաբերությունը Ռուսաստանի հետ՝ իր բարձրակետում է:

Իհարկե, բոլորը հասկանում են, որ ԱԽՔ Արթուր Բաղդասարյանը բանակում չի ծառայել  և կարող է չպատկերացնել, թե ինչ է իրենից ներկայացնում տանկն ու ՀՄՄ-ն: Բայց երբ, այդպիսի դիրքորոշում է ցուցաբերում պաշտոնյան, որն ի պաշտոնե, պարտավոր է պայքարել ու ապահովել Ազգային անվտանգությունը, դա անհասկանալի էր բոլորիս համար: Ինչ խոսք ողբալի է այն ժողովրդի վիճակը, որի Ազգային անվանգությունն ապահովում են Արթուր Բաղդասարյանները, որոնց ոչ ոք չի հարցնում որտեղի՞ց այդ անբավ հարստությունը:

Պատմում են, որ բոլոր ժամանակների գործիչի, որին շարժման մեջ է դրել Լևոն Տեր –Պետրոսյանը, տրամադրությունը շատ բարձր է եղել հատկապես Բյուրականի աստղադիտարան ռուս պաշտոնյայի հետ կատարած այցի ժամանակ: Նա օգտվելով առիթից` հպարտությամբ ու հիացմունքով է նայել մի քանի տասնյակ հեկտարների վրա փռված բարձր տուֆակերտ պարսպով շրջապատված իր ընտանեկան սեփականություն հանդիսացող գինու և կոնյակի գործարանին:

Արցախյան ազատամարտի ժամանակ քաղաքական ուժերի թևի տակ թաքնված, իսկ այնուհետև Սերժ Սարգսյանի «օրհնությամբ» քաղաքական օլիմպ բարձացած ՕԵԿ առաջնորդը արդյո՞ք այդ պահին մտածում էր Հայաստանի և նրա շահերի մասին, թե իր ընտանեկան հարստությամբ էր հպարտանում, ոք չի կարող ասել: Սակայն այն, որ երկրի նախագահ Սերժ Սարգսյանը չի ընդունում, որ  հասարակության միտքը խռովվում է մեր պաշտոնյաների անբավ հարստության մասին խոսելուց, դա համարում է սխալ ու պոպուլիստական, սակայն նորմալ է համարում, երբ իր պաշտոնյանները կարող են թալանել, գռփել, փաստ է:

Ռուզան Ավոյան