Արտակարգ իրավիճակների նախարար Արմեն Երիցյանի կարծիքով՝ բյուջեն թալանված չէ և այն գտնվում է վարչապետի ամենօրյա հսկողության ներքո:

Նախարարն անդրադառնալով Վերահսկիչ պալատի 5 նկատառումներին, ասել է. «Մեկը Արագածոտնու մարզում էր կարճվել, քանի որ եղել է փոքրիկ հրդեհ, վնասը կազմել է 45 հազ. դրամ, գյուղապետը գրավոր գրություն է գրել, որ տվյալ անձնավորությունը բնակվում է տնակում, տարեց մարդ է և չի կարող 25 հազ. դրամը մուծել: Մենք կիրառել ենք ՀՀ վարչական օրենսդրության համապատասխան հոդվածը և բանավոր զգուշացրել քաղաքացուն: Մյուս երկու դեպքերը գրանցվել են Արարատում, որոնք երկուսն էլ 2010թ-ին տուգանվել են 25 հազարական դրամով»:

ՎՊ-ի կողմից արձանագրվել է, որ նախարարության տեսուչների կողմից 55 կրկնակի կարգադրագրեր են ներկայացվել համապատսխան օբյեկտներ: Արմեն Երիցյանն այս մասով նշել է, որ դա  տեսուչի իրավունքն է՝ մեկ տարվա ընթացքում իրենք կարող են կարգադրագիրը ներկայացնել օբյեկտներին, որ խնդիրները վերացնեն:

Ինչ վերաբերում է նրան, թե  ԱԻՆ-ի բողոքարկման հանձնաժողովը առանց հիմնավորման է կարճել «Երևանի առաջին տպարան» ՓԲԸ վերելակների վարչական վարույթը, ապա նախարարը տեղեկացրել է, որ գործում է երկու վերելակ՝ մեկը անցել է տեխնիկական անվտանգության ստուգումը և գործում է, մյուսը կոնսերվացված է և ընդհանրապես չի աշխատում:

Արմեն Երիցյանը հաշվետվություն ներկայացրեց նաև այն մասին, թե ինչու է հաշվետու ժամանակշրջանում տեխնիկական անվտանգության կանոնները և նորմերը խախտելու համար տեսչության կողմից նշանակված 48 մլն 500 հազ. դրամից  պետբյուջե մուծվել 26 մլն 241 հազ. դրամ:
«Մենք ներրկայացրել ենք, որ սա գործընթաց է և արդեն 11 մլն 350 հազ դրամը մուծվել է և մնացել է 10 մլն-ը: Բայց սա դատարանով պետք է լուծվի: Մարդիկ դիմում են դատարան, և դատարանը կորոշի հարցը»,- նշել է նա:

Իսկ ՎՊ-ի այն արձանագրությանը, թե 33 օբյեկտներ տեխնիկական քննություն չեն անցել,  Արմեն Երիցյանը նկատել է, որ դրանցից 8-ը գտնվում են վարչական վարույթում, 10-ը փորձաքնոնւթյան եզրակացություններ են ներկայացրել, 8-ի դեպքում ՎՊ-ի տվյալները հին են, քանի որ նման օբյեկտներ այլևս գոյություն չունեն, 4-ը փակ վիճակում են, 3-ն էլ արտադրական վտանգավոր օբյեկտներ չեն: