ՀՀ էկոնոմիկայի նախարար Վահրամ Ավետիսյանն այսօր լրագրողների հետ հանդիպմանը, ներկայացնելով հաշվետվությունը, անդրադարձել է բիոզուգարանների խնդրին:

Նրա խոսքով, ՎՊ-ի արձանագրությունը, թե դրանք չեն աշխատում չի համապատասխանում իրականությանը:

Այն հարցին, թե արդյոք 100 մլն արժողությամբ բիոզուգարաններից ՀՀ-ն օգուտներ ստացե՞լ է, նախարարը պատասխանել է. «Չեմ կարծում, որ զուգարանից պետք է եկամուտ ստանալ: Հանրային զուգարանները չեն տեղադրվում եկամուտ ստանալու, այլ տուրիզմը զարգացնելու համար: Շահույթի տեսանկյունից եթե դիտարկենք, այո՛, դրանք անարդյունավետ են»:

Վահրամ Ավետիսյանը նույնպես կարծում է, որ նման գումարով նպատակահարմար չէ զուգարաններ ձեռք բերել:

Էկոնոմիկայի նախարարն անդրադարձել է նաև նախարարության կողմից իրականացվող ՓՄՁ-ների ծրագրին:

Ըստ նրա, հիմնական խնդիրն այն է, որ այն շատ ռիսկային է, սակայն, նախարարի խոսքով, նման ծրագիրը պետք է շարունակվի:

«Պետք է հասկանալ, որ ցանկացած ձեռնարկություն առաջին տարում փող ստանալով հնարավոր չէ, որ մեծ շահույթ ստանա: Ծրագիրը իրականացվում է մարզերում՝ հատկապես սահմանամերձ տարածքներում»,-նշել է նա:

Նախարարը համակարծիք չէ ՎՊ-ի այն գնահատականին, թե Գյումրու տեխնոպարկի ծրագիրը  գտնվում է անորոշ վիճակում:
«ՎՊ-ի անհանգստությունը հիմնականում այն է, որ ընդհանուր առմամբ Գյումրին նախատեսված է վերածել տեխնոքաղաքի, իսկ դա մեծ ծրագիր է, որը մշակվել է 2008-ին և որի համար անհրաժեշտ է 45 մլն դոլար: Սակայն ճգնաժամը թույլ չի տալիս դա իրականացնել»,-ընդգծել է նա և հավելել, թե տեխնոպարկի կենտրոնը դեկտեմբերի շինարարությունը ավարտված կլինի, որի վրա ծախսվել է 762 մլն դրամ: