Այսօր «ՎԱՐԿԱԾ» ակումբում հյուրընկալված ՔՀԳՎ երրորդ վարչության պետի տեղակալ, ոստիկանության գնդապետ, անչափահասների գործով բաժնի պետ Արթուր Վարդանյանը տեղեկացրեց, որ 2013թ-ի առաջին 5 ամիսների ընթացքում Հայաստանում գրանցվել է անչափահասների նկատմամբ սեռական ոտնձգության  թվի աճ. այս տարի այն կազմել է 23 դեպք,  նախորդ տարվա նույն ժամանակահատվածի համեմատ 12 դեպքով ավելի:

Գրանցված դեպքերից շուրջ 20-ը աղջիկների հետ են պատահել:

Ըստ նրա, դեպքերի ավելացումը պայմանավորված է մի քանի հանգամանքներով. «Պատճառները տարբեր են.  դրանցից են ծնողների կողմից անչափահասների նկատամբ  հսկողության, դաստիարակության բացակայությունը,  ծնողների կողմից ցուցաբերված անհետևողականությունը, նաև ինտերնետը»:

Արթուր Վարդանյանի տեղեկացմամբ, անչափահասների նկատմամբ սեռական ոտնձգություն կատարողները հիմնականում  հանդիսանում են մայրերի ընկերները, խորթ հայրերը, կամ ովքեր հաճախ են մտնում-ելնում այդ ընտանիք:
Անչափահասների գործով բաժնի պետը հայտնեց, որ հիմնականում դեպքերը գրանցվում են Երևան քաղաքում, և սեռական ոտնձգության են ենթարկվում 13-14 տարեկան անչափահասները, իսկ ամենափոքրը՝ 9 տարեկանն է:
Արթուր Վարդանյանը  տեղեկացրեց, որ այս տարի գրանցվել է մեկ դեպք, երբ անչափահասի նկատմամբ ոտնձգություն է իրականացրել մեկ այլ անչափահաս, իսկ նախորդ տարի գրանցվել է նման 3 դեպք:

Անդրադառնալով  երեխաների նկատմամբ ոտնձգություն կատարողների հանդեպ կիրառված պատժամիջոցներին,  Ոստիկանության գնդապետը նկատեց. «Այսօր էլ պատիժները մեղմ չեն, առավելագույն պատիժը մինչև 15 տարվա ազատազրկումն է: Երեխաների նկատմամբ սեռական ոտնձգություն կատարողները հնարավոր է նաև հարկադիր բուժման ենթարկվեն, իսկ կանխարգելման համար ոստիկանությունը անչափահասների շրջանում, դպրոցներում պրոֆիլակտիկ, կանխարգելիչ դասընթացներ է անցկացնում»: