Այսօր «Ֆորում» ակումբում հյուր էին արվեստաբան, թատերագետ Լևոն Մութաֆյանը և ՀՀ վաստակավոր արտիստ Ռազմիկ Խոսրոևը:

Մութաֆյանը  կարծում է, որ  կինոյում և թատրոնում կրիմինալի պրոպագանդա է գնում՝ սխալ է օգտագործման ձևը: Ըստ նրա, սերիալներն այսօր հենված են կրիմինալի վրա` ոչ ճիշտ դաստիարակություն սերմանելով. «Սերիալներն իրենց շեշտը դրել են կրիմինալի վրա, դրա շուրջը ստեղծում են հերոսներ` կարծելով, թե իրական կյանքի արտացոլումը դա է»։

Արվեստաբանի կարծիքով, էկրանն այսօր հասարակական թույլ շերտերին մղում է դեպի կրիմինալ դաշտ։

Ասուլիսի մյուս բանախոս՝ ՀՀ վաստակավոր արտիստ Ռազմիկ Խոսրոևի խոսքով, սերիալը մեր երկրում դեռևս նոր է զարգանում, ըստ նրա, սա նոր ուղի է,  որը պետք է ոչ թե ոչնչացնել, այլ ավելի որակյալ դարձնել, զարգացնել, որ պտուղներ տա:

«Հանրությունը քիչ է կարդում և այդ բացը լրացվում է սերիալներով»,-կարծիք  հայտնեց Խոսրոևը: Լևոն Մութաֆյանը ՝ հակադարձելով նրան, նշեց, որ այսօրվա դեռահասը, նոր ձևավորվող մարդը, գնում է կրիմինալի հետքերով: «Լիսկայակերպ տարրերն արդեն մեզ համար դարձել են սոցիալական տիպար, և այսօր մարդկանց պահանջն է իմանալ, թե Լիսկան ինչպե՞ս է պատժվելու: Այստեղից է բխում հասարակության բուռն հետաքրքրությունը, ոչ թե հասարակությունը կարոտ է կրիմինալի, այլ կարոտ է դրա հատուցումը տեսնելուն, այն, ինչը մեր իրականության մեջ չկա» -նկատել է Մութաֆյանը: