Արդեն տեղեկացրել ենք, որ երեկ Սյունիքում տեղի է ունեցել հերթական ռազբորկան` Լիսկայի՝ Սյունիքի մարզպետ Սուրեն Խաչատրյանի տանը տեղի ունեցած կերուխումից հետո:

Ըստ «Հայկական Վարկածին» Գորիսից հասած լուրերի, տեղի բավականին հարգարժան Բուդաղյան ընտանիքի զավակներից մեկը սպանվել է, մյուսը՝ ծանր վիրավոր է:
Մահացածը Գորիսի քաղաքապետի նախկին թեկնածու Ավո Բուդաղյանն է, իսկ վիրավորներից մեկը՝ նրա եղբայրը՝ Արտակ Բուդաղյանը, որը Լեռնային Ղարաբաղի Հանրապետության N զորամասի հրամանատար է, մյուս վիրավորը՝ Նիկոլայ Աբրահամյանն է` Սյունքի մարզպետ Ս. Խաչատրյանի ազգականը և թիկնապահը:

Ինչպես արդեն հաղորդվել է, հունիսի 2-ին՝ ժամը 00:10-ի սահմաններում, Սյունիքի մարզպետ Սուրեն Խաչատրյանի տան մոտ հնչել են կրակոցներ:

Ի՞նչ է տեղի ունեցել. ԼՂՀ նախագահ Բակո Սահակյանի, որն երեկ այցելել էր Սյունիք, «Սդղի լիճ» կոչվող օբյեկտում հյուրասիրությունից հետո, կեր ու խումը տեղափոխվել է Սուրիկ Խաչատրյանի տուն:
Ճաշկերույթին, մեր ունեցած տեղեկությամբ, մասնակցել են նաև Բուդաղյան եղբայրները, որոնց և մարզպետի միջև եղած նախկին լարված հարաբերությունները, ըստ գորիսեցիների, կարծես թե վերջին շրջանում կարգավորվել էր և նրանք եղել են հյուրերի թվում:
Սակայն մարզպետի տանը շարունակած քեֆը հարամվել է, երբ հյուրերն ու տանտերը, արդեն հարբած վիճակում, որոշել են իրենց հարաբերությունները կարգավորել բակում:

Վիճաբանությունն ավարտվել է կրակոցներով, որից հետո սպանված Ավո Բուդաղյանին տարել են և թողել Գորիսի հիվանդանոցի դիահերձարանի մոտ, մյուս եղբորը՝ ՊՆ սպա Արտակ Բուդաղյանին Գորիսի հիվանդանոցից տեղափոխել են Երևան: Երևան է բերվել նաև թեթև հրազենային վնասվածք ստացած մարզպետի մորաքրոջ թոռը՝ Լիսկայի թիկնապահը:
Գորիսեցիները կարծում են, որ այս «խմորը դեռ շատ է ջուր վերցնելու», և այս միջադեպը հերթական վենդետայի հիմքն է դնելու բդեշխական Հայաստանում, որտեղ հանգիստ կարող են ցանկացած ինֆորմացիա մատուցել՝ ինչպես հարկավոր է վերևներին: