Գիտական ու մշակութային մի շարք ոլորտներում ունեցած ներդրումների այսօր 22 գործիչներ արժանացան ՀՀ նախագահի 2012թ. մրցանակին, որոնցից 4-ը երիտասարդական մրցանակներ էին:

Մինչ մրցանակների հանձնումը ելույթ ունեցավ ՀՀ նախագահ Սերժ Սարգսյանը և նշեց, որ մրցանակների ու պարգևների հանձնումը ՀՀ նախագահի ամենահաճելի պարտականություններից մեկն է: «Միամտություն կլիներ կարծել, թե բոլոր ստեղծագործողները միանշանակորեն համաձայնվում են հանձնաժողովի որոշման հետ, բայց այդպես էլ, երևի թե, պետք է լիներ: Կոչ եմ անում բոլոր ստեղծագործողներին լինել համբերատար, հանդուրժողական, և ես համոզված եմ, որ լավագույն ստեղծագործությունները, եթե ոչ այս տարի, ապա մյուս տարի կարժանանան հանձնաժողովի գնահատանքին»,- ասաց նա և համոզմունք հայտնեց, որ դահլիճում հավաքված են լավագույններից լավագույնները:

Նախագահը հատուկ անդրադարձավ մրցանակակիրներից գեղանկարիչ Հակոբ Հակոբյանին, ով հետմահու արժանացավ մրցանակի: Սերժ Սարգսյանը նշեց, որ մեծ նկարչի տաղանդը և խորը, ոչ ցուցադրական հայրենասիրությունը նրան բերեցին վարպետի կոչման, որը շնորհում է հենց ժողովուրդը:

Նախագահը անդրադարձավ Հայոց ցեղասպանության ճանաչման գործում նշանակալի ավանդ ունեցողներին և նշեց, որ մրցանակի է արժանանում հայագետ, ցեղասպանագետ, ազգությամբ գերմանացի Թեսա Հոֆմանը և Սփյուռքի կարևորագույն հաստատություններից մեկը՝ «Զորյան ինստիտուտը»: «Ի դեմս տիկին Հոֆմանի, մենք ճանաչում են եվրոպական ու գերմանական հումանիստական ավանդույթը, որն իր ձայնն էր բարձրացնում տառապանքի ուղիներ անցնող հայ ժողովրդի համար: «Զորյան ինստիտուտի» աշխատանքում արտացոլվել է հայոց սփյուռքի բյուրեղացած ոգին»,- ասաց նա:

Նախագահը ընդգծեց, որ մրցանակների միջոցով ոչ միայն երախտագիտություն է հայտնում, այլև հորդորում՝ անել ավելին:

«Զորյան ինստիտուտի» տնօրեն Գուրգեն Սարգսյանը նշեց, որ հարևան երկրների միջև խաղաղություն հաստատելու համար պետք է պատմության միասնական եզրեր գտնել, ինչը կարող է բերել երկխոսության, ցեղասպանության ճանաչման և հաշտեցման:

«Զորյան ինստիտուտը փորձում է բացահայտել 1915-ի կատարվածը, թարգմանում ու հրապարակում է հայկական ու թուրքական փաստաթղթերը: Մենք հավատացած ենք, որ միայն թուրք հասարակությանը լուսավորելու շնորհիվ, կարելի է հասնել պատմական ճշմարտության: Այդ իդեալական միջոցն է կանխարգելելու մնացած ոճրագործությունների կրկնումը: Մեր ինստիտուտը պատրաստ է ներկայացնել իր տեսլականը և ռազմավարությունը այստեղ՝ Հայաստանում»,- ասաց նա:
Ելույթ ունեցավ նաև ցեղասպանագետ Թեսա Հոֆմանը և նշեց, որ հայերի աննահանջ պահանջները ներշնչում են ոչ միայն իրեն, այլ նաև սփյուռքի հայ սերունդներին: Նա ընդգծեց, որ հայ ազգի ներդրումը ցեղասպանությունների կանխարգելման մեջ հնարավոր չէ չգնահատել: «Ես հույս եմ հայտնում, որ գերմանական կառավարությունը օրենսդիր մարմինը, վերջապես, կձևակերպի օրենսդրական հստակ կարծիք, 1.5 մլն հայերի ու կես միլիոն արամալեզու քրիստոնյաների ոչնչացման հետ կապված 100-րդ տարելիցին ընդառաջ»,-ասաց նա:

Նշենք, որ ՀՀ նախագահի մրցանակների հովանավորն է Պողոսյան հիմնադրամը: