Այս հոդվածի կարիքը չէր զգացվի, եթե պատահաբար հեռուստատեսությամբ ունկնդիր չլինեի «Հարսնաքարի» գործով դատավարության ժամանակ Ռուբեն Հայրապետյանի ինքնավստահ և մարտահրավեր նետող պատասխաններին:

Երբ կցկտուր ափսոսանքից հետո, նա ինքնավստահ հպարտանում է իր 21 շքեղ մեքենաներով. ինձ մոտ այն տպավորությունն էր, որ, կարծես, սպանվել է ոչ թե  հայ երիտասարդ մարդ, հայ սպա, հայ ռազմական բժիշկ, այլ ժողովրդի թշնամի:

Ոչ ոք չէր կարող պատկերացնել, որ 21-րդ դարում մայրաքաղաք Երևանում՝ անպատժելիությունից ու ամենաթող հովանավորչությունից լկտիացած, հաստաբազուկ ու հաստավիզ հայերի կողմից դաժանորեն ծեծի կենթարկվի հայոց բանակի սպա 35-ամյա Վահե Ավետյանը, որի գլխին այն քանակի անխնա հարվածներ կհասցնեն , որ գիտակցության չգալով՝ կմահանա:

Եվ ուղղակի հարց է առաջանում՝ մեղավորը կատարողներն են, թե՞ նա, ով ստեղծել է համապատասխան բարոյահոգեբանական մթնոլորտ, որի արդյունքում կատարվել է դաժան սպանություն:

1915 թվականին, Չերքեզ Ահմեդը՝ քարի վրա դնելով հանճարեղ Գրիգոր Զոհրապի գլուխը, այն ջարդեց քարով, իսկ երբ այդ մասին նա պատմում է թուրք լրագրողին, որն անձամբ ճանաչել էր Գրիգոր Զոհրապին, նա ծանր մոխրամանով սպանում է Ահմեդին:

Պատմությունն այսօր չի ներում հայերին կոտորած չերքեզահմեդներին և թուրք խուժանին, սակայն չի ներում նաև  Երիտթուրքեր կուսակցության պարագլուխներին, ում ծրագրով ու հովանավորությամբ կազմակերպվեց հայերի կոտորածը:

Ո՞վ է մեղավոր. հայ սպային դաժանորեն ծեծող ճորտի հոգեբանությամբ ստահակները, թե՞ ստահակներին աճեցնող ու դաստիարակող Ռուբեն Հայրապետյանը: Կատարվել է աննախադեպ ու աններելի դեպք, որի համար պատասխան պետք է տան բոլորը, որովհետև ձեռնոց է նետվել մեծագույն սրբությանը՝ Հայոց բանակին:

Զարմանալի է, որ մենք չենք ներում Էնվերին, Թալիաթին, Ջեմալին, բայց ներողամիտ ենք Ռուբեն Հայրապետյանի նկատմամբ: Մենք չենք ներում Իլհամ Ալիևին և ադրբեջանական հասարակությանը՝  հայ սպային կացնահարած Սաֆարովին ազատություն շնորհելու համար, բայց ներում ենք Ռուբեն Հայրապետյանին և թույլ ենք տալիս, որ նա ղեկավարի ֆուտբոլի ֆեդերացիան և երկրի նախագահի հետ առոք-փառոք բազմած՝ ֆուտբոլ և օլիմպիական խաղեր դիտի:

Պետք է բոլորը պատասխան տան. ժամանակն է նեմեսիս իրականացնել՝ հայոց պետությունն ու հայ ժողովրդի պաշտպանունակությունը թուլացնող ցանկացած մեկի նկատմամբ:

Վոլոդյա Հովհաննիսյան

ԵԿՄ անդամ, ազատամարտիկ, պահեստի գնդապետ, պատմաբան-հասարակագետ