Շվեդիայի Մալմո քաղաքի Malmo Arena-ում կայացավ «Եվրատեսիլ 2013» երգի միջազգային մրցույթի եզրափակիչ փուլը, որի արդյունքներով մրցույթի հաղթող դարձավ Դանիայի մասնակից Էմելի դե Ֆորեսթը`Only Teardrops երգով: Երկրորդ տեղում Ադրբեջանն է, երրորդում` Ուկրաինան: Մեր երկիրը ներկայացնող Dorians խումբը, չնայած փայլուն կատարմանը, չընդգրկվեց լավագույն տասնյակում` զբաղեցնելով 18-րդ հորիզոնականը:

Իհարկե, անկեղծ չեմ լինի, եթե ասեմ, որ ուշադիր հետևել եմ «Եվրատեսիլ 2013»-ի եզրափակիչին նախորդող իրադարձություններին: Սակայն ինձ միշտ հետաքրքրել է այն ֆոնը, որն ուղեկցել է այս հեղինակավոր միջազգային մրցույթին:

Այդ համատեքստում` հատկապես այն ակնկալիքներին, որ ունեցել ենք մենք` հայերս:

Մեծ գաղտնիք բացահայտած չեմ լինի, եթե ասեմ, որ մենք Եվրատեսիլի մրցույթներին մասնակցել ենք` մտքներումս ունենալով այն բոնուսը, որն ակնկալել ենք Սփյուռքից:

Այս մոտեցումը ես միշտ էլ սխալ եմ համարել, որովհետև, եթե մարզական, մշակութային միջոցառումներում մեծ են լինում քաղաքական, ազգային գործոնները, դրանք մի տեսակ կորցնում են իրենց առաքելությունը:

Երեկվա եզրափակիչը, կարծում եմ, կոտրեց Սփյուռքի գործոնի բարդույթը:

Արտերկրում ապրող մեր հայրենակիցներին Եվրատեսիլը չի հետաքրքրում, կամ` նրանք քվեարկություն կատարելիս չեն առաջնորդվում բացառապես ազգային շարժառիթներով, ինչն, իհարկե, ողջունելի է, որովհետև ես էլ երբեմն հիանում եմ, ասենք, ֆուտբոլի Թուրքիայի ընտրանու հրաշալի խաղով:

Մեր Dorians-ը շատ լավն է, բրավո մերոնց:

Բայց այս մրցույթում ուժեղ էին Դանիայի, Ադրբեջանի և Ուկրաինայի ներկայացուցիչները: Բրավո` նաև նրանց:

Կարևորը` Եվրատեսիլի առաքելությունն է` մշակութային ժառանգության իմաստով, նաև այն, որ նման միջոցառումները նպաստում են ժողովուրդների մերձեցմանը, ծառայում են խաղաղությանը:

Իսկ մենք պետք է հետևություններ անենք, հասկանանք, որ հետայսու շեշտը պետք է դնել ոչ թե սփյուռքահայության աջակցության վրա, այլ ամեն կոնկրետ միջոցառման համար` ընտրենք այն կատարողին և կատարումը, որոնք կարող են հաղթանակի նախապայման դառնալ:

Հավատացեք` այդ դեպքում, մերոնց ձայն կտան ոչ միայն մեր հայրենակիցները, այլև` արվեստն ու մշակույթը գնահատող միլիոնավոր եվրոպացիներ:

Սուրեն Սուրենյանց